Qajymuqan kóshesinde tórt kúnge kólik qozǵalysy shekteledi.
2023 jyly joǵaryda atalǵan ýchaskede jańǵyrtý jumystaryn júrgizgen «ASKADI» JSHS merdigeriniń kepildik mindettemesi sheńberinde asfált-beton jabynynda anyqtalǵan aqaýlardy joıý maqsatynda ýaqytsha shekteýler engizilýde. Bul jumys merdigerdiń óz qarajaty esebinen júrgiziletin bolady, dep habarlaıdy Almaty-akshamy.kz.
Qajymuqan kóshesiniń boıymen Gospıtálnaıa kóshesinen Dostyq dańǵylyna deıin 2024 jylǵy 27 maýsymda saǵat 09.00-den 1 shildedegi 08.00-ge deıin avtokólik quraldarynyń qozǵalysy jabylady.
Atalǵan kóshe boıynsha eki baǵytta da kólik qozǵalysy jabylady.
Esterińizge sala keteıik, merdiger «ASKADI» JSHS 2023 jyly 25 jyldan astam jyl qyzmet etýimen óziniń normatıvtik qyzmet etý merzimin ótegen, uzyndyǵy 617 metr qubyrdy jańǵyrtqan bolatyn.
Qubyr 86 kóppáterli turǵyn úı turǵyndaryn, 6 mektep, 4 balabaqsha, 14 densaýlyq saqtaý obektisin jáne 15 basqa nysandy jylýmen jáne ystyq sýmen qamtamasyz etip otyr. Jańǵyrtý osy ýchaskede jylý shyǵynynyń, tozýdyń jáne apatty jaǵdaılar týyndaýy yqtımaldyǵynyń deńgeılerin azaıtýǵa múmkindik berdi.
Ýaqytsha qolaısyzdyqtarǵa túsinistikpen qaraýlaryńyzdy jáne bul aýmaqty aınalyp ótý joldaryn aldyn ala qarastyrýlaryńyzdy suraımyz.