Týrısik kompanıaǵa qatysty tergeý bastaldy.
Almatyda bir top azamat «Káýsar trevel» týrfırmasyna aldandyq dep aryz jazǵan, dep habarlaıdy Almaty-akshamy.kz KTK arnasyna silteme jasap.
Telearnanyń málimetine sáıkes, qajylyq pen ýmraǵa aparatyn týrısik kompanıaǵa 300-den asa adam aldanǵan. Basym bóliginiń Mekke men Mádınaǵa ushý merzimi áldeqashan ótip ketken. Endi ózgeleri týrfırmanyń bylyǵy kóp ekenin bilip, qomaqty qarajatyn qaıtaryp berýdi talap etip otyr. Aldanǵan adamdardyń árqaısy joldamany 500-600 myń teńgeniń tóńireginde satyp alypty. Bárine birdeı osyndaı tólendi degen bir japyraq qaǵaz ǵana ustatqan.
«Káýsar treveldiń» áleýmettik jelide turǵan nómiri óshirýli. Sóıtse, kompanıa eshbir jerde tirkelmegen, ne lısenzıasy joq.
«Ýmra men qajylyqqa aparatyn kompanıalar da «Týrısik qamqor» qorynyń tiziminde turady. Osyǵan nazar aýdarý kerek. Al «Káýsar trevel» kompanıasy tizimde joq. Tirkelmegen. Turǵyndar qyzmet kórsetýdegi zań buzýshylyqqa tap bolǵan sıaqty. Bul kompanıaǵa júginer aldynda týrısik kodty talap etýińiz kerek edi», - deıdi «Týrısik qamqor» qorynyń tóraǵasy Inna Reı.
Aldanǵanyn kesh túsingen jurt polıseılerge jappaı aryz jazdy. Tártip saqshylary osy kompanıaǵa qatysty tergeýdi bastady.
«Almaty PD, Medeý aýdany PB-na bir kún buryn eki adam aryzdansa, búgin taǵy segiz jábirlenýshi aryz jazǵan. Mán-jaıy jan-jaqty zerdelenip, QR zańnamasyna sáıkes, odan ári shara qoldanyla otyryp, quqyqtyq baǵa beriletin bolady», - deıdi Almaty qalasy polısıa departamentiniń resmı ókili Saltanat Ázirbek.