Túnde uıqysynan aıyrylǵan 350 turǵyn psıhologıalyq keńes alǵan
Almaty qalalyq psıhıkalyq densaýlyq ortalyǵynyń senim telefonyna bıyl on aıda 4 myńnan astam turǵyn habarlasyp, psıhologıalyq túıitkilin aıtyp, keńes suraǵan, dep habarlaıdy Almaty-akshamy.kz.
Ortalyq dırektory Sapar Rahmensheevtiń aıtýynsha, oıynqumarlar, onlaın nesıe alyp qaryzǵa batqandar da sherin tarqatyp, telefondarǵa damyl bermeıtin bolǵan.
Bıyl áleýmettik máselelerin aıtyp, 500-den astam adam qońyraý shalypty. Olar qumar oıyndarǵa qunyǵyp, aqshasynan aıyrylǵandar, dostaryna, kredıtorlarǵa onlaın nesıe beretin uıymdarǵa qaryzy qordalanyp, otbasyndaǵy kıkiljińnen qajyp, bolashaqqa senimsizdik, kóńil-kúıiniń kúrt qubylýy, qarjylyq máselesin sheshýdiń joldaryn suraǵan.
Ekinshi orynda densaýlyǵyna shıpa izdegen 384 kisi medısınalyq mekemeler, emhanalar, portaldy rásimdeý boıynsha suraqtar qoıǵan. Budan keıin tizimde mazasyz kúıge shyrmalyp, degbirin qashyryp, túnde uıqysynan aıyrylǵan 350 turǵyn psıhologıalyq keńes alǵan. Kóp jaǵdaıda jalǵyzdyq, jumystan aıyrylý, sóılesetin, syrlasatyn adamy joq jandar jurt uıqyda jatqanda habarlasyp, sherin tarqatady eken.
-Túrli kompúterlik oıyndarǵa tapqan-taıanǵanyn tigip opyq jegenderdiń kóbeıýi qazirgi zamannyń ózekti problemasy. Olar óziniń isine, áreketine esep bere almaıdy. Búgin jolym bolady, utys alamyn degen úmitpen oıyn klýbtaryna qalaı baryp, qaltasyn qaǵyp shyqqanyn ózi bilmeıdi. Kómek suraǵan azamattar bizdiń ortalyqqa kelýge uıalady. Soǵan qaramastan jeke sóılesip, ár adam jaıly aqparatty qupıa saqtap, biz olarǵa jan-jaqty keńes beremiz. Al onlaın nesıe alýǵa qumar adamdardyń máselesine kóz jumýǵa bolmaıdy. Bul nesıelerdiń jarnamasy myqty. Ári talap qatal emes. Bir núkteni basyp aqsha alyp, soǵan óziniń qalaı táýeldi bolyp qalǵanyn keıbireýler baıqamaıdy. Munyń bir ǵana joly psıhologtarǵa kelip, osy qumarlyq, táýeldilik, qunyǵyp ketýden arylýǵa áreket etý kerek, - deıdi ortalyqtyń dırektory Sapar Rahmensheev.
Ortalyqtyń senim telefondaryna elimizdiń túkpir-túkpirinen kún saıyn 30-ǵa jýyq turǵyn habarlasady. Muńyn aıtyp, tyǵyryqtan shyǵatyn jol izdegen jandarǵa tórt klınıkalyq psıhologtar táýlik boıy keńes beredi. Sáýle Ibashevanyń aıtýynsha qumar oıyndardyń quryǵyna jipsiz baılanǵan jigitterdiń basym bóligi boıdaq, jasy 35-25 jastaǵy eńbekke etýge qabiletti, tepse temir úzetin jigitter.
- Olar kóbinese túnde qońyraý shalady. Túrkistan oblysy, Aqtaý, Atyraý jáne Kókshetaýdan jıi habarlasady. Shaǵyn aýdan, kishkentaı aýylda turady. Kórshileri, aýyldastarym oıynqumar ekenimdi bilip qoımasyn dep kópshilikten jasyryp júrgenin aıtady. Olarda bolashaqqa senimsizdik, kúızelisten sharshaǵan. Ókinishke qaraı bizge habarlasqan turǵyndardyń kóbisi aýyrtpalyqty jalǵyz kóterip júrgen adamdar. Olarǵa biz qandaı mamanǵa barý kerektigin aıtyp, jol kórsetemiz,- deıdi Sáýle Ibasheva.
Bıyl senim telefonyna óz ózine óol jumsaımyn dep eki júzden astam adam qońyraý shalǵan. Psıhologtar olardyń birnesheýin raıynan qaıtarǵan. Budan ózge esirtki zattaryn, alkogól tutynyp, úıdiń berekesin qashyrǵan qalalyqtar da jıi habarlasady eken. Almaty qalalyq psıhıkalyq densaýlyq ortalyǵynda senim telefondary 2015 jyly iske qosyldy. Aqtaý, Qaraǵandy, Kókshetaý, Taraz, Astana, Atyraý, Qyzylorda jáne Túrkistan oblysy turǵyndaryna da qyzmet kórsetedi.