Almatyda QR İshki ister mınıstrligniń M. Esbolatov atyndaǵy akademıada qoǵamdyq qaýipsizdiktiń «servıstik modeline» kóshý máselesi boıynsha mamandandyrylǵan semınar-trenıngter ótýde dep habarlaıdy almaty-akshamy.kz
Almaty qalasy ákiminiń orynbasary Erjan Babaqumarov semınardy asha otyryp, polısıanyń «servıstik modelin» engizý jumystary Memleket Basshysynyń Joldaýyn oryndaý aıasynda júrgizilip jatqanyn atap ótti. Basty mindet – halyqpen birlesken jumysty kúsheıtý arqyly qylmystyń aldyn alýdyń tıimdiligin arttyrý.
Servıske baǵyttalǵan polısıa qyzmeti – bul polısıa men qoǵamǵa jańa ádisterdi qoldaný arqyly qylmystyń, quqyq qorǵaý jáne qaýipsizdik máselelerin yntymaqtastyqpen sheshýge múmkindik beretin model.
Búginde Almatyda «servıstik polısıany» engizýdiń pılottyq aýmaǵy shaǵyn aýdan deńgeıinen Alataý aýdanyna deıin (aýdanda 300 myńnan astam adam turady) ulǵaıdy. Sondyqtan atalǵan aýmaqty kartaǵa durys túsirý, quqyq buzýshylyqtyń aldyn alý men qoǵamdyq qaýipsizdikti nyǵaıtýdyń qosymsha sharalaryn taldaý jáne ázirleý maqsatynda vedomstvoaralyq jumys tobynyń músheleri úshin semınar-trenıngter ótkiziledi.
Semınar-trenıngtiń maqsaty – vedomstvoaralyq jumys tobynyń múshelerin polısıa qyzmetindegi zamanaýı álemdik tásilderge, derektermen jumys jasaýǵa,sondaı-aq «polısıanyń servıstik modeli» tujyrymdamasy aıasynda halyqpen ózara is-qımyl boıynsha áreket etýge oqytý.
Vedomstvoaralyq jumys tobynyń quramyna qalalyq basqarmalardyń, Almaty qalasy polısıa departamentiniń, prokýratýranyń jáne ÚEU ókilderi kiredi. Semınarǵa qoǵam qaıratkeri, Eýropadaǵy qaýipsizdik jáne Yntymaqtastyq Uıymynyń (EQYU) polısıa reformasy jónindegi keńesshisi Elmıra Hısamýtdınova qatysty.
Eske salsaq, buryndary, aǵymdaǵy jyldyń maýsym-qarasha aılarynda «polısıanyń servıstik modeli» Almaty qalasynyń eki aýdanynda iske qosyldy, olar: Bostandyq aýdanynyń «Keremet» TK jáne Alataý aýdanynyń «Ójet» shaǵyn aýdany. Pılottyq jobany iske asyrý qorytyndylary onyń tıimdi ekenin kórsetti.