Almatyda polısıa oqýshylarǵa quqyqtyq saýattylyq boıynsha sabaq ótkizdi.
Almaty qalasynyń ıývenaldy polısıasy mektep oqýshylarynyń quqyqtyq saýattylyǵyn arttyrý maqsatynda “Tamos Education” mektebiniń 5-6 synyp oqýshylary arasynda semınar-trenıng ótkizdi, dep habarlaıdy aqshamnews.kz.
— İs-sharanyń maqsaty – kámeletke tolmaǵandar arasynda quqyqtyq mádenıet pen saýattylyqty arttyrý jáne zań buzýshylyqtyń kez kelgen kórinisterine tózbeýshilikti qalyptastyrý. Biz qatysýshylarǵa jeke qaýipsizdik sharalary men qoǵamdyq oryndarda ózin-ózi ustaý erejelerin eske túsirdik. Jasóspirimderdiń Konstıtýsıa negizderin bilýi bizdi qatty tań qaldyrdy, balalar ákimshilik kodekstiń birneshe babyn biletinderin kórsetti. Bul jerde ustazdar qaýymynyń tamasha jumysy baıqalady. Sonymen qatar, beıtanys adamdarmen kezdesken kezde saqtyq tanytyp, kómekke júginýge bolatyn “102” telefon nómirin eske saldyq, - dedi, Almaty qalasy PD JPQB ıývenaldy polısıa bóliminiń bastyǵy Janna Shonjanova.
Sondaı-aq spıker, shaharda kámeletke tolmaǵandarǵa barynsha bilim berý, onyń ishinde quqyqtyq bilim berý tájirıbesi jalǵasyp jatqanyn eske saldy.
— Biz mektep oqýshylarymen quqyq buzýshylyqtyń aldyn alý týraly áńgimelesemiz, jalpy bilim beretin mektepterde oqýshylar arasynda zańǵa baǵyný minez-qulqyn qalyptastyrý arqyly quqyqtyq tártipti saqtaýǵa jáne nyǵaıtýǵa baǵyttalǵan quqyqtyq jáne uıymdastyrýshylyq sharalar kesheni týraly aıtamyz. Sondaı-aq dıalogtar azamattyń, qoǵamnyń jáne memlekettiń qundylyqtary týraly áńgimeler boıynsha qurylǵan, - dedi Janna Shonjanova.