Áleýmettik jelilerde birneshe kólik júrgizýshisi tarapynan jol júrý erejeleriniń óreskel buzylǵany túsirilgen beınejazba tarady.
Kadrlarda qarama-qarsy jolaqpen júrý, artqa qozǵalý, agressıvti júrgizý jáne basqa da qaýipti manevrler jasalǵan. Atalǵan derek boıynsha jergilikti polısıa qyzmetimen tekserý júrgizilip, júrgizýshiler anyqtaldy, dep habarlaıdy aqshamnews.kz.
Barlyq kólik arnaıy aıyppul turaǵyna qoıyldy. Jol qozǵalysynyń basqa qatysýshylaryna qaýip tóndirip, avtokólikti artqa qaraı júrgizgen júrgizýshilerdiń biri sot sheshimimen 10 táýlikke ákimshilik qamaýǵa alyndy. Jergilikti polısıa qyzmeti basqarmasynyń bastyǵy Serik Shýmaev jol erejesin elemeý aýyr saldarǵa alyp kelýi múmkin ekenin atap ótti.
— Jol — beıqamdyqty keshirmeıdi, al jol júrý erejelerin ádeıi elemeý jazasyz qalmaıdy. Joldaǵy qaýipsizdik — barlyǵymyzdyń ortaq jaýapkershiligimiz. Árbir júrgizýshi táýekelge toly manevrler bireýdiń ómirin jalmaýy múmkin ekenin este ustaýy qajet, – dedi, Serik Shýmaev.
Polısıa jol qozǵalysy erejelerin saqtaýǵa jáne jolda basqa qatysýshylarǵa qurmetpen qaraýǵa shaqyrady.