İshki ister mınıstri jarıalaǵan "Profılaktıka jyly: polısıa zań men tártip kúzetinde", sondaı-aq "Eseptegi tulǵa" respýblıkalyq jedel-aldyn alý is-sharasy aıasynda Almaty qalasynyń polısıa qyzmetkerleri bas bostandyǵynan aıyrý oryndarynan bosatylǵan azamattarǵa áleýmettik-quqyqtyq kómek kórsetý jáne olardy jumysqa ornalastyrý baǵytynda júıeli jumystar júrgizip jatyr.
Tek Túrksib aýdanynyń ózinde bul is-shara barysynda ishki ister organdarynda profılaktıkalyq esepte turǵan úsh adam turaqty jumyspen qamtyldy, dep habarlaıdy aqshamnews.kz.
– Buryn sottalǵan azamattardyń qylmysqa qaıta barmaýy úshin olardyń áleýmettik qorǵalýy men qoǵamǵa beıimdelýi asa mańyzdy. Tájirıbe kórsetkendeı, turaqty tabysy joq adamdar qylmysqa jıi barady. Sondyqtan biz probasıa qyzmetimen birlese otyryp, jumysqa ornalastyrý baǵytyndaǵy jumystardy turaqty túrde júrgizemiz. Ýchaskelik polısıa ınspektorlary jumyspen qamtý ortalyqtaryna aı saıyn eseptegi azamattardyń tizimin joldap otyrady. Ótken jyly osyndaı sharalar nátıjesinde 24 adam turaqty jumysqa ornalasqan, – dedi Túrksib aýdandyq polısıa basqarmasynyń basshysy Dýman Aýhadıev.
Sonymen qatar qaıtalanatyn qylmystardyń aldyn alý maqsatynda ýchaskelik ınspektorlar probasıa qyzmetimen birlesip, esepte turǵan azamattardyń turǵylyqty jeri boıynsha kúndelikti tekserý jumystaryn júrgizýde. – Búginde aýdanymyzda 318 azamat túngi ýaqytta turǵylyqty jeri boıynsha tekserildi. Nátıjesinde úsh zań buzýshylyq anyqtaldy. Onyń ishinde bir azamatqa QR ákimshilik zańnamasyn buzǵany úshin hattama toltyryldy, al eki adamǵa qatysty sottyń merziminen buryn shartty túrde bosatý týraly sheshimi joıyldy, – dedi Dýman Aýhadıev.
Aqparat kózi Polisia.kz saıtynda: https://polisia.kz/almatyda-politsiya-buryn-sottalghan-azamattardy-zhumysqa-ornalastyrugha-komektesti/