Qoǵamdyq qaýipsizdikti qamtamasyz etýde jańa tehnologıalardy keńinen qoldaný – zaman talaby.
Osyny eskere otyryp, Almaty qalasynyń polısıasy quqyq buzýshylyqtardyń jáne jol-kólik oqıǵalarynyń aldyn alý maqsatynda áleýmettik rolıkter, sújetter men reportajdar ázirleýge erekshe nazar aýdarady, dep habarlaıdy aqshamnews.kz Polisia.kz-ke silteme jasap.
Bul medıa ónimder keıinnen teledıdar ekrandarynan kórsetilip, ınternet-portaldarda, polısıa departamentiniń resmı akkaýnttarynda jarıalanady, sondaı-aq áleýmettik jeliler arqyly keńinen taratylady.
- Jol qozǵalysy qaýipsizdigi taqyrybynda ázirge úsh beınerolık daıyndaldy. Olar joldaǵy qaýipti jaǵdaılarǵa yqpal etetin jáne kóbinese iri jol-kólik oqıǵalarynyń sebebine aınalatyn erejebuzýshylyqtardyń jıi kezdesetin túrlerin qamtıdy. Sonymen qatar bul beınematerıaldar barlyq jastaǵy kórermenderge arnalǵan, – dedi Almaty qalalyq PD ákimshilik polısıa basqarmasynyń bastyǵy Asqat Qulbaev.
Spıkerdiń aıtýynsha, jaıaý júrginshilerdiń qatysýymen bolatyn jol-kólik oqıǵalarynyń sany jyl saıyn artyp keledi. Bul – qoǵam úshin alańdatarlyq jaǵdaı. - Jol qozǵalysyna qatysýshylardyń árqaısysy, eń aldymen, óz qaýipsizdigin oılap, jol erejelerin qatań saqtaýy tıis. Balalar úlkenderdiń is-áreketin qaıtalaıtyndyqtan, eresekter olarǵa durys úlgi kórsetýi qajet. Sol sebepti árbir ata-ana ózine de, balasyna da qaýipsiz orta qalyptastyrýǵa mán berýi kerek. Biz jaıaý júrginshilerdi jol qozǵalysy mádenıetin saqtaýǵa shaqyramyz, – dep atap ótti Asqat Qulbaev.