Qyz bala úıden shyǵyp ketken, biraq mektepke deıin jetpegen
Almatyda patrúldik polısıa qyzmetkerleri 9 jasar Aısha Tımýrdy qalaı tapqanyn aıtyp berdi, – dep habarlaıdy Almaty-akshamy.kz Polisia.kz-ke silteme jasap.
7 jeltoqsan kúni kámeletke tolmaǵan Aısha Tımýrdyń joǵalǵany týraly habar Almatyny dúr silkindirdi.
Tańerteńgi saǵat 07:40-ta qyz bala úıden shyǵyp ketken, biraq mektepke deıin jetpegen.
– Bizge saǵat 09:00 shamasynda 9 jasar Aıshanyń joǵalǵany týraly habar kelip tústi. Belgileri: qyzǵylt kúrteshe, kók qalpaq, qyzyl sómke, qara etik. Biz mekenjaı boıynsha bardyq. Aqparat rastaldy. Balany izdestirý jumystaryna Túksib aýdandyq PB-nyń jeke quramy, Almaty garnızony men eriktiler jumyldyryldy. Bizdiń aýysym saǵat 16:00-de aıaqtaldy. Biraq kúndizgi izdestirý nátıje bermegendikten, men jáne áriptesterim qyzmette qalyp, balany izdeýdi jalǵastyrdyq. Men – úsh balanyń ákesimin. Qyzdarymnyń biri – Aıshamen qurdas. Meni Aıshanyń taǵdyry qatty alańdatty. Búkil garnızon, Almaty qalasynyń barlyq turǵyndary qyz úshin alańdady, – dedi Jergilikti polısıa qyzmeti basqarmasy patrúldik polısıa polkiniń ınspektory Almas Quraqbaev.
Tártip saqshysynyń aıtýynsha, beınebaqylaý júıeleriniń arqasynda qyzdyń troleıbýsqa mingenin anyqtaý múmkin boldy.
– Júrgizýshiniń nómirin troleıbýs parkiniń dıspecherinen suradyq, oǵan telefon soqtyq, ol Aıshanyń troleıbýsta ekendigin rastady. Bul týraly dereý JBO-nyń kezekshisine habarladyq. Eriktilermen birge Baıtursynov pen Buqar jyraý kósheleriniń qıylysynda troleıbýsty qýyp jettik. Aısha ishinde boldy. Men ony kóterip, patrúldik kólikke otyrǵyzyp, Polısıa basqarmasyna aparyp, ata-anasyna tapsyrdym. Qudaıǵa shúkir, ol aman-esen tabyldy, – dedi polısıa qyzmetkeri Quraqbaev.