Sot otyrysy onlaın rejımde ótti
Almatyda gastroenterolog Iýrıı Shýmkovtyń ólimine qatysty is boıynsha sot otyrysy jalǵasýda, dep habarlaıdy Almaty-akshamy.kz QazAqparatqa silteme jasap.
Sot otyrysy onlaın rejımde ótti. Sottalýshy tergeý ızolátorynan qatysty. Onyń barysynda polısıa departamentiniń patrúldik polısıa polkiniń qyzmetkeri men taksı júrgizýshisinen jábirlenýshi retinde jaýap alyndy. Almaty qalalyq İİD Alataý aýdandyq patrúldik polısıa basqarmasynyń komandıri, polısıa aǵa leıtenanty Omarhanov prokýrordyń suraqtaryna jaýap berdi. Ol dáriger qaza tapqan kúni, ıaǵnı 4 sáýirde, qyzmette bolǵan. Tańǵy saǵat 09:40 shamasynda qalada «kúdiktini ustaý» jospary jarıalanǵan.
«Biz kúdikti otyrǵan kólikti ustaýǵa attandyq. «Sergek» bazasynyń málimeti boıynsha, kólik «Shańyraq» shaǵynaýdanyna qaraı bet aldy. Barlyq ekıpaj sońynan erdik, kólik Ótemisov kóshesiniń boıyndaǵy bir úıdiń janynda toqtap tur eken. Men jáne úsh áriptesim ony ustadyq», - dedi tártip saqshysy. Onyń aıtýynsha, ustalǵan kezde kúdikti artqy oryndyqta tegis uńǵyly myltyqpen otyrǵan. «Ustaý kezinde kúdikti qarsylyq kórsetti. Ústine kıgen kúrteshesiniń qaltasynan asqana pyshaǵy túsip qaldy»,- deıdi ol.
Sonymen qatar, sot barysynda taksı júrgizýshisi de sóıledi. Aıtýynsha, ol sol kúni saǵat 8:00-de áıelin jumysqa alyp barǵanyn, sodan keıin qosymsha arqyly tapsyrys qabyldaı bastaǵan. Klıentti Baıqadamov kóshesine aparyp tastap, kóligin turaqqa qoıyp jatqan kezinde qolyna qarý ustaǵan beıtanys er adam ruqsatsyz kóliginiń artqy oryndyǵyna otyryp, kólikti otaldyryp, júrgizýdi buıyrǵan.
«Ol maǵan myltyq kezep, kettik dedi. Men qorqyp, Baıqadamov kóshesiniń boıymen júrdim. Sodan keıin ál-Farabı-Saın-Rysqulovqa shyǵyp, «Shańyraq» yqshamaýdanyna qaraı bet aldyq. Polısıa bizdi sol jerde ustady», - dedi ol. Jábirlenýshi kúdiktiniń ózi qaıda barý kerektigin aıtyp otyrǵanyn jáne jolda telefonyn alyp, emhanaǵa habarlasqanyn aıtty. «Maǵan dárigerdi óltirgenin aıtyp, keıin 30 myń teńge berdi», - deıdi kýáger.
Buǵan deıin Iýrıı Shýmkovtyń ólimine qatysty istiń sotqa joldanǵany týraly jazǵan edik.
Eske sala ketsek, bıylǵy 4 sáýir kúni Almatyda dáriger emdelýshi pasıentiniń qolynan qaza tapty. Ony kúdikti ańshy myltyǵymen atyp tastaǵan. Asa aýyr qylmys qalanyń Bostandyq aýdanynda bolǵan. Kúdikti qalada engizilgen arnaıy jospar barysynda Alataý aýdany aýmaǵynda ustaldy. Keıin QR Densaýlyq saqtaý mınıstri Ajar Ǵınıat Iýrıı Shýmkov pen pasıent arasynda qandaı da bir janjaldyń bolmaǵanyn aıtty.