Almaty qalasynyń Almaly aýdandyq soty «Almaty qalasy PD emhanasy» MM meńgerýshisine jáne dáriger-terapevtke qatysty qylmystyq is boıynsha úkim shyǵardy.
Almaly aýdandyq sotynyń sýdıasy Ernar Qasymbekovtiń aıtýynsha, emhana basshysy men dáriger birneshe ret para alǵany úshin aıyptalǵan.
Aýdandyq sottyń aqparaty boıynsha, emhananyń bas dárigeri terapevt arqyly emhananyń pasıentterinen eńbekke jaramsyzdyq paraǵyn ashqany jáne uzartqany úshin birneshe ret para alǵan. Paranyń jalpy somasy 111 000 teńgeni qurady, dep habarlaıdy Almaty-akshamy.kz.
Sot otyrysynda sottalýshy óz kinásin moıyndaǵan joq. Onyń nusqasy boıynsha, ol dárigerden dárýmenderdi satý jáne merekege aqsha jınaý úshin qaryz alǵan.
Óz kezeginde terapevt óz kinásin moıyndap, sotqa ol aýrýhanalyq paraqtardy ashqany jáne uzartqany úshin pasıentterden alynǵan aqshany basqarýshyǵa tapsyrǵanyn, al óz úlesin ózine qaldyrǵanyn aıtty.
Sot S. esimdi aıyptalýshynyń kinási is materıaldarymen, atap aıtqanda, NSD nátıjeleri bar beınejazbamen, para bergen kýágerler - pasıentterdiń aıǵaqtarymen, ony áshkereleıtin aıǵaqtar bergen sottalýshy D-nyń aıǵaqtarymen, kýágerlerdiń aıǵaqtarymen dáleldendi degen qorytyndyǵa keldi. Sonymen qatar S.sotqa deıingi is júrgizý barysynda advokatynyń qatysýymen para alýdyń bir epızodyn moıyndady.
Almaly aýdandyq sotynyń sýdıasy Ernar Qasymbekovtiń aıtýynsha, emhana meńgerýshisine jaza taǵaıyndaý kezinde sot onyń asyraýynda jesir áıel retinde jalǵyz baǵyp otyrǵan stýdent balalarynyń bolýyn jáne aýyrlatatyn mán-jaılardyń bolmaýyn eskerip, oǵan 60 eselengen para somasy - 6 015 912 teńge mólsherinde aıyppul salyp, ony qamaýda ustaýdy shegerip tastady.
Terapevtke osy isti tergeýde onyń belsendi yqpal etýin eskere otyryp, 1 mln teńge aıyppul taǵaıyndaldy.
Alynǵan para somasy memleket kirisine óndirilip alyndy.
Sonymen qatar sot Almaty PD bastyǵynyń atyna sybaılas jemqorlyq qylmystaryn jasaýǵa yqpal etken sebepter men jaǵdaılardy joıý boıynsha sharalar qabyldaý úshin jeke qaýly shyǵardy.
Sot úkimi zańdy kúshine engen joq.