28 gvardıashy-panfılovshylar atyndaǵy qalalyq saıabaqta Aýǵan soǵysynyń ardageri polkovnık Borıs Kerimbaevty eske alýǵa arnalǵan is-shara ótti.
12 qańtarda aty ańyzǵa aınalǵan Qara maıor Borıs Kerimbaev 76 jasqa tolar edi. Internasıonalıs-jaýyngerdi eske alýǵa arnalǵan jıynǵa Radıoelektronıka jáne baılanys áskerı-ınjenerlik ınstıtýtynyń merzimdi qyzmet sarbazdary, polkovnık Borıs Kerimbaev jáne «Kırov» atyndaǵy áskerı-patrıottyq klýbtardyń tárbıelenýshileri jınaldy.
– Biz aty ańyzǵa aınalǵan Qara maıordyń aramyzdan ketkenine qaıǵyra otyryp, ol kisiniń janqıarlyq erligiginen qýat alamyz. Borıs Tókenulynyń ónegesi eń qıyn jaǵdaılar men bitispes qaqtyǵystarda da dıalogqa oryn bar ekenin kórsetedi, – dedi áskerı ınstıtýttyń besinshi kýrs kýrsanty Meıirjan Dosahmetov.
Borıs Tókenuly Kerimbaev áskerı qyzmetke ómiriniń 35 jyldan astam ýaqytyn berdi. Onyń eń qıyn, ári jaýapty kezeńi Aýǵanstanda ótti. Ol Almaty oblysynyń Qapshaǵaı qalasyndaǵy 22-shi arnaıy maqsattaǵy qurama bazasynda uıymdastyrylǵan 177-shi arnaıy maqsattaǵy jasaqty basqardy. Bul qurylym negizinen qyrǵyzdardan, qazaqtardan, ózbekterden jáne tájikterden quralǵan soń «musylman batalóny» dep atalatyn.
Aýǵanstannyń Pandjsher shatqalynda modjahedter men Keńes áskeri arnaıy kúshteri arasyndaǵy qıan-keski urystar boldy. Daryndy komandır Borıs Kerimbaev az ǵana kúshpen tosqaýyl qoıyp, bıiktikterge shabýyldar jasady, jaýdy shatastyrý úshin jalǵan manevrler uıymdastyrdy. Sondyqtan onyń bólimshesi eń qaýipti degen jerlerden árqashan az shyǵynmen shyǵatyn.
Kara maıor keremet kelissóz júrgizýshi de bola bildi. Ol modjahedterdiń eń yqpaldy degen dala komandırin bitimge kelýge májbúr etti. Sol sebepti Borıs Tókenulynyń «Pandjsher patshasy» dep atalýy kezdeısoqtyq emes.
Qarýly kúshterdiń áskerı qyzmetshileri, áskerı joǵary oqý oryndarynyń kýrsanttary, ulandar men jasarbazdyqtar dańqty batyrdy eshqashan umytpaq emes. Memlekettik áskerı-tarıhı mýzeıde Batyrǵa arnalǵan ekspozısıalar ornalasqan. Týǵan jeri Almaty oblysynyń Raıymbek kentinde memorıaldyq eskertkish, turǵan úıiniń qabyrǵasyna memorıaldyq taqta ornatylǵan.