102 aýmaq jáne 12 isten shyqqan kolektor anyqtaldy
Almatyda sý tasý máselesin sheshý úshin keshendi jumystar júrgizilýde. Sýdyń jaıylýynan kóbirek zardap shekken 56 aýmaqta apattyq-qalpyna keltirý jumystary bastaldy, dep habarlaıdy Almaty-akshamy.kz.
Raıymbek dańǵylynyń soltústik bóligine dıametri 1 metrlik 2 sý ótkizgish qubyr ornatyldy, bul Iassaýı men B.Momyshuly kóshelerinen keletin erigen sýdy ótkizedi. Osy aýmaqta, Raıymbek dańǵylynyń joldy bólý jolaǵynda qabyldaǵysh kameralar ornatylady. Sondaı-aq Iassaýı kóshesiniń qubyr ótkizgishi burynnan bar sý ótkizgish kolektorǵa jalǵanady, al B.Momyshuly kóshesiniń qubyr ótkizgishi burynnan bar Raıymbek-Momyshuly aıryq júıesiniń ótkizgishine qosylady.
Ekologıa jáne qorshaǵan orta basqarmasynyń mamandarynyń aıtýynsha, búginde qala boıynsha dıametri 500 mm-lik sý ótkizgish qubyrlar bar, bular qaladaǵy sý aǵynyna tótep bere almaıdy. Sondyqtan da sýdyń ótkizgishtigin qamtamasyz etý úshin dıametri 1 metrlik qubyr ótkizgishter ornatylýda. Osylaısha qaladaǵy qubyrlardyń sý ótkizgishtigi 2 esege ulǵaıady.
«Qala basshysynyń tapsyrmasy boıynsha bizdiń basqarma Almatynyń sý jaıylatyn aımaqtaryna monıtorıń jasady. Nátıjesinde 102 aýmaq jáne 12 isten shyqqan kolektor anyqtaldy. Solardyń ishinde 56 aýmaq sýdyń jaıylýynan qatty zardap shegetinin, sondyqtan tez arada bıyldan qaldyrmaı apattyq qalpyna keltirý jumystary qajet ekeni anyqtaldy», dedi Almaty qalasy Ekologıa jáne qorshaǵan orta basqarmasynyń strategıalyq damý bóliminiń jetekshisi Murat Jeksembaev.
Sondaı-aq monıtorıń barysynda 12 kolektorǵa tazalaý men qalpyna keltirý jumystary qajet ekeni jáne 4 sý ótkizgish kanal salý qajettiligi anyqtaldy. Búginde qalada Emsov pen Rysqulov dańǵylynyń tómen jaǵyndaǵy sý ótkizgish qubyrlardy qalpyna keltirý jumystary júrgizilýde. Osy aýmaqtaǵy jumystar 20 kún boıy júredi.