Alqaly jıynda Almaty qalasy, Jetisý jáne Almaty oblystarynyń mektep dırektorlary, bilim basqarmalary men bólimderiniń basshylary bilim berý salasyndaǵy ózekti máselelerdi talqylady.
2023 jylǵy bilim salasyndaǵy barlyq baqylaý is-sharalarynyń qorytyndysy boıynsha Oqý-aǵartý mınıstrligi birqatar tejeýshi faktorlardy anyqtady. Bul, óz kezeginde, usynylatyn bilim berý qyzmetteriniń, bilim sapasynyń tómendeýine jáne balalardyń bilim alý quqyqtarynyń buzylýyna ákeledi. Nátıjesinde mınıstrlik tarapynan ádistemelik usynymdar berip, barlyq anyqtalǵan zańbuzýshylyqtardy joıý boıynsha jumys jasaldy.
Jıynǵa respýblıkalyq kadr rezerviniń músheleri - "Bilim berýdegi jańa ózgeristerdiń 1000 kóshbasshysy" baǵdarlamasynyń birinshi pleıadasynyń túlekteri de qatysty.
"Bilim berýdegi jańa ózgeristerdiń 1000 kóshbasshysy" jobasy meniń kóptegen áriptesterime óziniń baǵyn synaýyna jaqsy múmkindik boldy. Baǵdarlamanyń basynan bastap biz irikteýdiń ártúrli kezeńderinen óttik. Elimizdiń ozyq mektepterinde oqydyq jáne taǵylymdamadan óttik. Men osy baǵdarlamanyń bir bóligi bolǵanyma qýanyshtymyn. Men elimizdiń ıgiligi men otandyq bilim berýdiń órkendeýi úshin odan da zor qulshynyspen jumys isteýge daıynmyn" — dedi Almaty qalasyndaǵy M.Maqataev atyndaǵy № 140 gımnazıasy dırektorynyń oqý-tárbıe jumysy jónindegi orynbasary Dáýren Saǵynǵalıev.
Esterińizge sala keteıik, Respýblıkalyq kadr rezervine 208 úmitker kirdi. Jańa býyn menedjerleri kadr tapshylyǵyn sheshýge jáne jańa mektepterdi, onyń ishinde "Jaıly mektep" ulttyq jobasy aıasynda salynyp jatqan bilim oshaqtaryn kadrlyq jaǵynan qamtamasyz etýge yqpal etedi dep josparlanýda.
Sondaı-aq, forýmda Almaty qalasy, Almaty oblysy jáne Jetisý oblysy mektepteriniń basshylary sóz sóıledi. Olar Oqý-aǵartý mınıstrine tikeleı saýaldaryn qoıyp, jaýaptaryn aldy. Kezdesýge elimizdiń úsh oblysynyń orta bilim berý uıymdarynyń 800 basshysy qatysty. Bul is-shara elimizdiń basqa óńirlerinde de jalǵasady.