Rejıser Aıjan Qasymbektiń «Ot» kartınasynyń premerasy boldy
Kórsetilim «Bastaý» İH halyqaralyq stýdenttik jáne debúttik fılmder kınofestıvali aıasynda ótti, dep habarlaıdy Almaty-akshamy.kz 24kz-ke silteme jasap.
Fılmniń álemdik premerasy osy jyly Pýsandaǵy halyqaralyq kınofestıvalde ótken bolatyn. Basqa da baıqaýlarǵa qatysyp, oljaly oralyp júr.
«Ot» kartınasy qazaqstandyq qarapaıym otbasy jaıynda. Otaǵasy el qatarly tirshilik etip, arasynda nesıe de alyp turady. Kúnderdiń kúninde jasóspirim qyzynyń júkti bolyp qalǵanyn estıdi.
«Meniń keıipkerim nan tasýshy bolyp isteıdi. Ózderi páter jaldap turady. Bankten alǵan nesıesi de bar. Osylaı kúneltip júrgen jan. Osyndaı qıyn jaǵdaıǵa qaramastan, meniń keıipkerim adamdyq ardan attamaıdy. Ón boıynan mahabbat, meıirimdilik, adaldyq pen ádildik bilinip turady», - deıdi akter Tólepbergen Baısaqalov
Týyndy sheteldik kórermenniń iltıpatyna bólenip júr. Pýsannan keıin Germanıa men Sıngapýrda kórsetildi. Al basty róldi oınaǵan Tólepbergen Baısaqalov X Russian British Sochi International Film Festival & Awards 2021 jáne Los-Andjelestegi Asian World Film Festival-de eki marapatty jeńip aldy. Al Mınskide ótken halyqaralyq «Listapad» kınobaıqaýynda kartına «Úzdik rejıser» jáne «Úzdik mýzyka» nomınasıalary boıynsha júldege ıe boldy.
«Bul januıa osyndaı qıyndyqqa qalaı tap boldy, ony qalaı sheshedi, osyny kórsetkimiz keldi. Birinshi orynǵa otbasy jáne kómek uǵymdaryn shyǵardyq. Sebebi qarbalas tirshilikpen júrip, qasymyzdaǵy jandarǵa kóńil bólmeı ketemiz. Osyny esten shyǵarmasaq deımin»,- dedi «Ot» fılminiń rejıseri Aıjan Qasymbek.
«Bastaý» halyqaralyq kınofestıvali aıasynda qoǵamǵa oı salatyn kartınalardy kórermenge usyný ıgi dástúrge aınalyp otyr. Bıylǵy stýdenttik jáne debúttik fılmder baıqaýyna 80 týyndy iriktelip alynǵan. Olar 4 jeltoqsanǵa deıin «Chaplin Cinemas» kınoteatrlar jelisinde tegin kórsetiledi.