Aýyr qylmys eki apta buryn Túrksib aýdanynda oryn alǵan.
Taksı júrgizýshisine birneshe jerden pyshaq suqqan úsh kúdikti qolǵa tústi, dep habarlaıdy Almaty-akshamy.kz Polisia.kz-ke silteme jasap.
«Úsh er adam bıznes-klastaǵy taksıge tapsyrys berip, júrgizýshiden olardy áýejaıǵa jetkizip tastaýyn suraǵan. Alaıda jolda jolaýshylar taksı júrgizýshisine shabýyl jasap, oǵan kóptegen pyshaq jaraqatyn salǵan. Shabýyldyń nátıjesinde qaskóıler Toyota Camry kóligin ıemdengen. Atalǵan qylmysty ashý maqsatynda jedel izdestirý toby qurylyp, onyń quramyna krımınaldyq polısıa jáne Túrksib aýdandyq PB-nyń qyzmetkerleri kirdi. Kúdiktiler dereý anyqtaldy. Olar jasyrynýǵa tyrysqan. Alaıda qazir kúdiktiler ustaldy jáne qamaýǵa alyndy. Qylmyskerler basqa bireýdiń kóligin kádege jarata almady. Sheteldik kólik ıesine qaıtaryldy», – dedi Almaty qalalyq polısıa departamenti bastyǵynyń orynbasary Berik Ábilbekov.
Qazir ustalǵandardyń basqa da qylmystarǵa qatysy bar-joǵy tekserilýde. Olar – 1993, 1998 jáne 2000 jyly týǵan Almaty oblysy Talǵar aýdanynyń turǵyndary.
«Maǵan shabýyl jasaǵan adamdardyń ustalǵany týraly habarlaǵanda, shynymdy aıtsam, qatty qýandym. Polısıa qyzmetkerlerine kásibı qyzmeti úshin alǵys aıtamyn», — dedi qaraqshylardyń qolynan japa shekken almatylyq.