Almatnyń Túrksib aýdanynda «Halyq qatysatyn búdjet» baǵdarlamasy boıynsha 2025 jyly 32 joba iske asyrylýda
2025 jyldyń maýsym aıynda Baým toǵaıy men Úlken Almaty kanalyn (ÚAK) abattandyrý boıynsha eki aýqymdy jobany iske asyrý bastalady. Bul týraly qala ákimi Erbolat Dosaev Túrksib aýdanynyń turǵyndarymen kezdesý barysynda málimdedi.
Jalpy aýdany 137,7 ga Baým toǵaıy Seıfýllın men Súıinbaı dańǵyldarynyń arasynda ornalasqan. Joba úsh aımaqqa bólýdi kózdeıdi: belsendi, rekreasıalyq jáne ekologıalyq shaǵyn arhıtektýralyq nysandardy ornatylady.
ÚAK abattandyrý jobasynda rekreasıalyq jáne jaǵajaı aımaqtaryn abattandyrý josparlanǵan.
«Bıyl aýdanda Maılın kóshesinen qala shekarasyna deıin, 13-shi áskerı qalashyqta jáne Maıborody kóshesinde Seıfýllın dańǵylynan Baıkal kóshesine deıin «Kishi Almaty» ózeni boıyndaǵy serýendeý aımaqtaryn jaılastyrý, sondaı - aq Hmelnıskıı kóshesiniń boıyndaǵy toǵandardy tazartý boıynsha taǵy 4 joba iske asyryla bastaıdy», - dedi Almaty ákimi.
Budan basqa, «Halyq qatysatyn búdjet» (HQB) baǵdarlamasyn iske asyrý sheńberinde aýdanda 2024 jyly 52 joba iske qosyldy. Aǵymdaǵy jyly sáýir aıynan bastap qoǵamdyq keńistikti abattandyrýǵa, avtomatty sýarýdy ornatýǵa jáne kósheni jaryqtandyrýǵa baılanysty 32 jobany iske asyrý jumystary bastalady.
Aıta keteıik, Almatyda HQB boıynsha 2024 jyly barlyǵy 364 joba júzege asyryldy. Almatylyqtardan berilgen ótinimder sany 2019 jylmen salystyrǵanda 18 ese ósti. Sol kezeńde turǵyndardan barlyǵy 333 jobalyq usynys kelip tústi, al 2024 jyly 6118 ótinim kelip tústi. Onyń ishinde daýys berýge 1402 joba jáne iske asyrýǵa – 316 joba jiberildi.
Baǵdarlamanyń tıimdiligi men turǵyndardyń tartylýyn eskere otyryp, 2024 jyly Almaty ákimi Erbolat Dosaev ony qarjylandyrýdy 18,8 mlrd teńgege ulǵaıtty, bul 2023 jylmen salystyrǵanda 5,8 mlrd teńgege artyq.