Eki jasar múgedek qyz bala men bir januıa tutas aman qaldy
Almatyda órt sóndirýshiler 2 jasar múgedek balany órtten qutkaryp qaldy. Bul týraly belgili qazaqstandyq sportshy, aralas jekpe-jek sheberi Ardaq Nazarov óziniń áleýmettik paraqshasynda jazdy, dep habarlaıdy Almaty-akshamy.kz QazAqparatqa silteme jasap.
Sportshy Bostandyq aýdanynyń órt sóndirýshilerine arnap jazba qaldyrdy.
Aıtýynsha, olardyń jedel is-qımyldarynyń arqasynda eki jasar múgedek qyz bala men bir januıa tutas aman qaldy.
«Sport zalǵa kirip bir saǵattaı jattyǵyp shyqqanymyzsha qasymyzdaǵy páter órtenip, bizdiń órt sóndirýshi batyrlarymyz otty tolyq sóndirip, eki jasar múgedek balany jáne bir januıany qutqaryp qalypty. Órt shyqqan páterdegi azamattar, ysqa tunshyqqannan ba, uıyqtaı bergen. Eger órt sóndirýshi batyrlarymyz kelmese, eki januıa qaıǵyly jaǵdaıǵa ushyrar ma edi ? Eki jasar múgedek balany órtten aman alyp shyqqan jigit Almaty qalasy, Bostandyq aýdanynyń órt sóndirýshi mamany Ádil Erkinuly. Bastaryn báıgege tikken batyr jigitterdiń eńbegi baǵalansa eken»,- dep jazdy ol Instagram paraqshasynda.
Qalalyq TJD baspasóz qyzmetiniń habarlaýynsha, tótenshe jaǵdaı 24 qarasha kúni saǵat 10:31-de Bostandyq aýdany, Kekilbaıuly kóshesi, 129/3 mekenjaıy boıynsha ornalasqan úıde bolǵan.
Órt sóndirýshiler oqıǵa ornyna 6 mınýtta jetken.
Belgili bolǵandaı, 3-shi qabattaǵy páterlerdiń biriniń balkonynan shyqqan órt bólmege tarap úlgergen.
«Ýly qara tútin turǵyndardy evakýasıalaý joldaryn bógep tastady. Qyzyl jalyn joǵarǵy qabattaǵy páterge taralý qaýpin týdyrdy. Páterde kishkentaı bala qalyp qalǵany týraly aqparat kelip tústi. Barlaý júrgizý barysynda MÓS-1 Órt sóndirýshi-qutqarýshysy Ádil Dáýrenqulov qolda bar tynys alý organdaryn qorǵaý quraldaryn paıdalana otyryp, tórtinshi qabattaǵy páterden eki jasar qyzdy shyǵardy. Jedel járdem brıgadasy qarap teksergennen keıin búldirshin ata-anasyna aman-esen tabystaldy»,- dep habarlady vedomstvodan.