Baspasóz týrdyń barysynda «Medeý» memlekettik óńirlik tabıǵı parkiniń aýmaǵynda orman órtterin erte anyqtaý júıesiniń iske qosylýy týraly Ekologıa jáne qorshaǵan orta basqarmasynyń ókilderi baıandady, dep habarlaıdy almaty-akshamy.kz.
Orman órtterin erte anyqtaý júıesi – bul orman monıtorıńine arnalǵan baǵdarlamalyq-apparattyq keshen, ol shuǵyl túrde sharalardy qabyldaýǵa jáne órt qaýiptiligi joǵary maýsymynda orman órtterinen bolatyn zalaldy aıtarlyqtaı azaıtýǵa múmkindik beredi.
Bul júıe aǵymdaǵy jyly «Medeý» MÓTP KMM-niń tapsyrysymen «Baılanys Telekom End Tehnolodjı» JSHS merdigerlik uıymymen ornatyldy. Jabdyq eki bólikten turady:
1. Aparattyq – basqarylatyn baqylaý dachıkteriniń (beınekameralardyń) jelisi;
2. Baǵdarlamalyq – arnaıy baǵdarlamalyq jasaqtama, onyń kómegimen ormanǵa jasalynatyn monıtorıń naqty ýaqytynda júzege asyrylady, órttiń koordınaty ýaqtyly anyqtalady.
Mamandardyń aıtýynsha, órtti anyqtaý táýlik boıy 360 gradýsqa qaraıtyn jáne 30 km-ge deıingi radıýsta jaǵdaıdy tirkeıtin beınebaqylaý kameralarynyń kómegimen júzege asyrylady, aýmaǵy 10 myń gektarǵa deıin jetedi. Júıeniń quramynda teplovızordyń jáne sezimtaldyǵy joǵary beınekameranyń bolýy ony tipti tolyq qarańǵylyqta da tıimdi etedi.
«Beınebaqylaý kameralary 3 ýchaskede - Shymbulaq, Medeý jáne Býtakov shatqalynda ornalasqan antena – dińgek qurylystarynda ornatylǵan. Beınebaqylaý júıelerinen aqparat «Medeý» MÓTP janyndaǵy jedel basqarý ortalyǵyna tıisti baılanys arnalary arqyly kelip túsedi, budan ári aqparat shuǵyl qyzmetterge ýaqtyly áreket etý úshin biryńǵaı beınemonıtorıng júıesine beriledi», - dedi Almaty qalasy ekologıa jáne qorshaǵan orta basqarmasy basshysynyń orynbasary Mıras Gaısın.
«Memleket basshysy ormandarda vıdeomonıtorıng júıesin engizýge qatysty tapsyrma bergen bolatyn. Osy tapsyrma aıasynda «Medeý» saıabaǵynda TJD daǵdarys jaǵdaıyn jedel basqarýy, bolǵan jaǵdaılarǵa der kezinde nazar aýdarýy jáne TJD qurylǵylaryn jiberýge qatysty monıtorıń júrgizý úshin vıdeokameralar ornatylǵan edi», - dep sózin tolyqtyrdy Almaty qalasy TJD Memlekettik órt baqylaý basqarmasy bastyǵynyń orynbasary Erkebulan Jumataev.
Órtti erte anyqtaý júıesiniń jumysyn tekserý úshin synaq rejıminde jasandy órteý júrgizildi. Nátıjesinde júıe tútindi birden baıqady, onyń naqty koordınattary men ýaqytyn anyqtady.