Alys-jaqyn sheteldiń kil myqty bıshileri Almatyǵa jınaldy.
A. Seleznev atyndaǵy Almaty horeografıalyq ýchılıshesinde horeografıalyq oqý oryndarynyń VIII halyqaralyq «Órleý» baıqaýy ótýde. 2023 jyldyń 4 sáýirinde bastalǵan is-shara 10 sáýirge deıin jalǵasady.
Horeografıalyq oqý oryndarynyń VIII halyqaralyq «Órleý» baıqaýy álemniń jetekshi balet mektepteri arasyndaǵy halyqaralyq yntymaqtastyqty damytý jáne nyǵaıtý maqsatynda 2008 jyly qurylǵan.
Baıqaýdyń maqsaty - horeografıalyq oqý oryndary arasynda keńinen tájirıbe almasýdy júzege asyrý, bı ónerindegi jas daryndardy anyqtaý, oryndaýshylyq sheberlikterin arttyrý, klasıkalyq, halyqtyq jáne zamanaýı bılerdiń ozyq dástúrlerin damytý, sondaı-aq Qazaqstan horeografıalyq bilimi men óneriniń álemdik arenadaǵy ımıjin ilgeriletý jáne básekege qabilettiligin arttyrý bolyp tabylady.
2018 jyly baıqaý IýNESKO demeýshiligimen Halyqaralyq balet baıqaýlary federasıasynyń múshesi mártebesin aldy, onyń prezıdenti - aty ańyzǵa aınalǵan Iýrıı Grıgorovıch.
Bıylǵy óner dodasyna Qyrǵyzstan, Ózbekstan, Reseı, Japonıa, Ońtústik Koreıa, Qytaı, Ońtústik Afrıka syndy elderden jınalǵan 150-ge jýyq horeograf qatysyp jatyr.
Baıqaýdyń horeografıalyq bilim berý salasynda mańyzdy dıdaktıkalyq mısıasy bar. Uıymdastyrýshylar baıqaýdyń árbir jańa maýsymyn Qazaqstannyń horeografıa óneriniń kórnekti qaıratkerlerine arnaıdy. Sonymen, horeografıalyq oqý oryndarynyń «Órleý» halyqaralyq baıqaýynyń VIII maýsymy qazaqtyń tuńǵysh kásibı balerınasy, Qazaq KSR Halyq ártisi Sara Ydyrysqyzy Kósherbaevanyń 90 jyldyǵyna arnaldy.
Sonymen qatar, «Qazaq horeografıalyq óneri men biliminiń kórnekti qaıratkerleri» jáne «Ulttyq horeografıalyq óner men bilimniń ózekti máseleleri» taqyryptarynda «Seleznev oqýlary» atty halyqaralyq ǵylymı-zertteý konferensıasy ótedi, onda 2023 jyly mereıtoılary atap ótiletin balet qaıratkerleri D. . Ábirov (100 jas) jáne B.G. Aıýhanov (85 jas) shyǵarmashylyqtary qarastyrylady. Konferensıanyń «Qazaq, qyrǵyz, ózbek bıleri mysalynda túrki halyqtarynyń halyq bıleriniń uqsastyqtary men aıyrmashylyqtary» taqyrybyndaǵy tájirıbelik bólimi Almaty, Ózbek jáne Bishkek horeografıalyq ýchılısheleriniń oqytýshylarynyń qatysýymen ótedi.
Baıqaý aıasynda Qazaqstannyń jáne sheteldiń horeografıalyq óneriniń jetekshi mamandarynyń sheberlik sabaqtary men semınarlary ótýde. Onyń ishinde Fransıanyń «Ruée des Arts» bı tobynyń «Costard» spektakliniń qoıylymy men zamanaýı horeografıa boıynsha sheberlik synyby josparlanýda.
Aıta keterligi, baıqaýdyń tarıhynda alǵash ret fınaldyq týrlar, jańa Almaty Theatre sahnasynda kórermenderdiń qatysýymen ótedi. Bul óz kezeginde uıymdastyrýshylarǵa jeke «halyq tańdaýy syılyǵyn» belgileýge múmkindik beredi. Baıqaý jas balet ártisteriniń eń úzdik nómirlerinen quralǵan gala-konsertpen aıaqtalady.