Radıoelektronıka jáne baılanys áskerı-ınjenerlik ınstıtýtynyń aqparattyq-nasıhattaý toby Túrksib aýdanyndaǵy № 78 mektep-gımnazıasynyń joǵary synyp oqýshylarymen kezdesti.
Áskerı bilim beretin mekemelerdiń ókilderi oqýshylarǵa QR Qarýly kúshterinde qyzmet etý perspektıvalary týraly áńgimelep berdi. Olardy joǵary oqý ornynyń tarıhymen, oqýǵa túsý erejelerimen jáne áskerı ınstıtýtta oqý sharttarymen tanystyrdy, dep habarlaıdy Almaty-akshamy.kz QR Qorǵanys mınıstrligine silteme jasap.
«Kezdesý qyzyq ótti. Bizge ómirin kúrdeli, biraq asa mańyzdy mısıaǵa – Otandy qorǵaýǵa arnaǵan áskerı adamdardyń batyldyǵy men erligi týraly aıtyldy. Óz ómirimdi osyndaı asyl mamandyqty úırenýge arnaımyn dep sheshim qabyldadym», – dedi «Jas sarbaz» synybynyń tárbıelenýshisi Shyńǵysqan Álimbekov.
Oqýshylarǵa beınematerıaldar kórsetilip, aqparattyq býkletter taratyldy.
Instıtýt bastyǵynyń tárbıe jáne ıdeologıalyq jumys jónindegi orynbasary polkovnık Medǵat Madrahımov mundaı is-sharalar kýrsanttardy irikteý sapasyn arttyrýǵa yqpal etetinin atap ótti.
Radıoelektronıka jáne baılanys áskerı-ınjenerlik ınstıtýty «áskerı istegi radıotehnıka jáne ınjınırıń», «áskerı istegi radıoelektronıka jáne ınjınırıń», «áskerı istegi avtomattandyrý jáne ınfokommýnıkasıalyq tehnologıalar», «áskerı istegi aqparattyq qaýipsizdik júıeleri», «áskerı istegi dırıjerleý», «áskerı istegi jýrnalısıka jáne qoǵammen baılanys», «áskerı qurylys, ǵımarattar men qurylystardy paıdalaný» mamandyqtary boıynsha ofıserler daıyndaıtynyn esterińizge sala keteıik.