Almaty onkologıalyq ortalyǵynda alty aı ishinde 10 myńnan astam naýqas emdeldi, dep habarlaıdy Almaty-akshamy.kz.
Almaty qalalyq onkologıalyq ortalyqtyń dırektory Nursultan İzmaǵambetovtyń aıtýynsha, Almaty onkologıalyq ortalyǵynda emdeletin naýqas sany jyl sanap artyp keledi.
«2016 jyly emdelgen naýqastardyń sanyna bıyl alty aıda jetip otyrmyz. Alty aı ishinde AOO hırýrgıalyq bólimshelerinde 1 300-den astam hırýrgıalyq aralasý jasaldy, bul ótken jyldyń sáıkes kezeńimen salystyrǵanda 95 ese kóp. Hımıoterapıalyq em alǵan naýqas sany 8 372-ge ósken (2022 jyly – 7810 boldy). Sáýlelik terapıa bóliminde 523 onkologıalyq naýqasqa 9632 sáýlelik terapıa seansy júrgizildi. Ambýlatorlyq hımıoterapıa kabıneti jaǵdaıynda birinshi jartyjyldyqta 4765 naýqas ambýlatorlyq em aldy. Qaterli isikke kúdikti jáne onkologıalyq naýqastarǵa 260 myńnan astam dıagnostıkalyq zertteý, atap aıtqanda, KT, MRT, endoskopıalyq zertteý, ÝDZ, sıtologıalyq zertteýler jáne t.b. júrgizildi. Ótken jyly 215 000-ǵa jýyq boldy», - deıdi Nursultan İzmaǵambetov.
Sondaı-aq 2694 naýqas anyqtalyp, esepke alynǵan, 2022 jyldyń 6 aıynda – 2363 naýqas boldy. Qaterli isik ishinde sút bezi obyry birinshi, toq ishek isigi ekinshi, ókpe qaterli isigi úshinshi, asqazan obyry tórtinshi orynda.
«Jalpy búginde Almaty onkologıalyq ortalyǵynda 30 699 onkologıalyq naýqas esepte tur (2022 j. 6 aıda – 28 415), ósim – 8 paıyz. Qazaqstannyń basqa óńirlerinen pasıentterdiń Almatyǵa kelip, qalalyq onkologıalyq ortalyq jaǵdaıynda joǵary sapaly medısınalyq kómek alyp, stasıonar jaǵdaıynda ambýlatorıalyq-emhanalyq dári-dármekpen úzdiksiz tolyq qamtamasyz etilip jatyr. Tek jyl basynan beri elimizdiń ózge óńirlerinen 420 naýqas Almaty qalasyna aýystyrylǵan. Ókinishke qaraı, árbir besinshi naýqas aýrýdyń asqynǵan satysymen esepke alynady. Bul rette qaterli isik aýrýyn erte anyqtaý ómirdi saqtaıtynyn taǵy bir eske salǵym keledi», - dedi Almaty qalalyq onkologıalyq ortalyqtyń dırektory Nursultan İzmaǵambetov.