Kúdikti qamaýǵa alyndy.
Almatyda oıyn klýbtaryna urlyqqa túsken jigit ustaldy, dep habarlaıdy Almaty-akshamy.kz Polisia.kz-ke silteme jasap.
Birqatar urlyq jasady degen kúdikpen 19 jastaǵy D. esimdi azamat ustaldy.
«Jas jigit oıyn prıstavkalarymen aınalysqan. Ol kelýshiniń atyn jamylyp, oıyn klýbtaryna baryp júrgen. Ózine yńǵaıly ýaqytta qyzmetkerlerdiń nazaryn aýdaryp, sol jerden tehnıkany urlaǵan. Kúdikti qamaýǵa alyndy. Óziniń urlyqqa qatysy baryn joqqa shyǵarmaıdy. Atalǵan derek QR QK-niń 188-baby 3-bóliginiń 2-tarmaǵy boıynsha sotqa deıingi tergeýdiń biryńǵaı tizilimine engizildi. Jas jigittiń jeke basy qalanyń basqa aýdandarynda jasalǵan osyǵan uqsas qylmystarǵa qatysy bar-joǵyna tekseriletin bolady. Sonymen qatar kúdikti urlanǵan múlikti qaıda satqanyn anyqtaıtyn bolamyz. Jedel-tergeý sharalary jalǵasýda», - dedi Áýezov aýdandyq polısıa basqarmasynyń bastyǵy Ulan Ábilqaıyr.