Almaty men Almaty oblysy shekarasynda nómirsiz kólikpen qarsy baǵytta júrgen polısıa qyzmetkeri jazalandy
Onyń vıdeosy áleýmettik jelide tarady. Oqıǵa 2 jeltoqsanda tańerteń Talǵar tasjoly boıynda Besaǵash aýylynyń mańynda bolǵan, dep habarlaıdy Almaty-akshamy.kz QazAqparatqa silteme jasap.
Oqıǵa kýágeri tańǵy saǵat 7.00 shamasynda «Mercedes» júrgizýshisiniń keptelis kezinde qarsy jolaqqa qalaı shyqqanyn kameraǵa túsirip alǵan. Jeli qoldanýshy júrgizýshiniń polısıa formasynda jáne kóliktiń nómirsiz bolǵanyn aıtty. Almaty qalalyq polısıa departamenti jaǵdaıǵa qatysty pikir bildirdi. Vedomstvonyń málimetinshe, vıdeoǵa patrúldik polısıa polkiniń qyzmetkeri túsip qalǵan. Ol birqatar jol qozǵalysy erejesin buzǵan.
«Qyzmetker ákimshilik jaýapkershilikke tartyldy. Qazirgi ýaqytta bul fakt boıynsha qyzmettik tekseris júrgizilip jatyr. Polıseıdiń áreketin Almaty polısıa departamentiniń tártiptik komısıasy qaraıdy, ári qaraı sharalar qoldanylady», - dep habarlady qalalyq polısıa departamentiniń baspasóz qyzmeti.