Almaty qalasyndaǵy eki kórneki oryndy jańǵyrtýdy josparlanyp otyr. Bul týraly Almaty qalasynyń ákimi E.Dosaevtyń Almaly aýdany turǵyndarymen kezdesýinde málim boldy, dep habarlaıdy Almaty-akshamy.kz.
- Bizdiń aýdanda qalanyń kórneki oryndaryna aınalýy tıis qalalyq mańyzy bar eki kórnekti nysan bar. Ókinishke oraı, olar qazir eshkimge kereksiz. Aýdan ákimine Nıkolskıı bazaryn qaldyrǵany úshin rahmet. Onyń jeke ıesi kim, sony anyqtaý qajet. Meniń usynysym bar: bul nysandy ıesiz dep taný kerek. Óıtkeni ol kóptegen jyldar boıy qańyrap bos tur nemese menshik ıesimen sóılesip, onyń durys bazar jasaýy úshin kelissózder júrgizý qajet. Álemde kásipkerler azyq-túlikti turǵyndar úshin qalypty baǵamen satatyn jáne saýda jáne tamaqtaný oryndarynan aqsha tabatyn bazarlar kóp.
Ekinshi nysan - tramvaı deposynyń ǵımaraty. Burynǵy ákim Baýyrjan Baıbek tujyrymdamanyń ashyq konkýrsyn ótkizse, Baqytjan Saǵyntaev jabyq "jekeshelendirgishke" aınaldyrdy, qoǵamdyq ǵımarattyń ornyna saýda ortalyǵynyń usqynsyz jobasyn jasady. Bul jobany qazir qurylys basqarmasy júzege asyrýǵa tyrysýda. Meniń ákim Erbolat Dosaevqa ótinishim – tujyrymdamany qaıtadan kópshiliktiń jarıa talqylaýyna shyǵaryp, qala turǵyndaryna unamasa, onda jańa konkýrs ótkizý kerek, -dedi Almaty qalasy qoǵamdyq keńesiniń múshesi Áset Naýryzbaev.
Ózekti máselege qatysty qala basshysynyń bergen jaýaby:
- Men Sizdi qoldaımyn. Rasynda da qalada kórneki oryndar az. Biz qalamyzdyń tarıhyna qurmetpen qaraımyz. Tarıhı oryndardy qaıta jańartýǵa, modernızasıalaýǵa tyrysamyz.
Nıkolskıı bazary boıynsha- munda men úshin saıası másele joq. Búginde oǵan ıelik etetin adamdar bar. Tıisinshe, sot isteri bolady, onyń qorytyndysy boıynsha osy aktıvpen ne isteý kerektigi týraly sheshim qabyldanady. Sondaı – aq, "Barys" bazaryna da qatysty másele bar. Sot sheshimderi shyqqan, onyń aktıvteri qalaǵa berildi. Endi biz máseleni anyqtap, sheshim qabyldaımyz. Nıkolskıı bazary da sondaı. Men olardy ıesiz dep tanyp, bir jyldan keıin ózime ala almaımyn. Óıtkeni qalada eshkim menshik quqyǵyn joıǵan joq. Biraq qazir bolyp jatqan prosesterge qatysty máseleler – olar aıaqtalǵannan keıin biz Nıkolskıı bazaryn qolǵa alatyn bolamyz. Birneshe ıdeıalarymyz bar. Bazardyń tarıhı ótken joldary bar. Biraq sońǵy 15-20 jyl ishinde onyń ımıji ózgerdi. Meniń oıymsha, ony qalpyna keltirýdiń qajeti joq, biraq yńǵaıly ári zamanaýı saýda oryndaryn jasaý kerek. Men menshik ıelerine usynys jasadym.
Endi depo týraly - bizde Almatynyń kreatıvti keńistigi aıasynda jumys aıaqtalýda. Men jasalatyn nárselerdi kórdim, baıqaýymsha nátıjesi jaqsy bolady. Bul iske bizdiń mamandardy ǵana emes, sheteldik kompanıalar da tartyldy. Jaqynda biz bul jobany jarıalaımyz.
Qala jeke ınvestorlarmen bolǵan áńgimelerden keıin depony ózine alady jáne jaqyn arada bul Almatynyń basty kreatıvti habyna aınalady. Men qoǵamdyq keńeste tapsyrma beremin. Biz jobany kórsetemiz jáne aıtyp beremiz. Eger eskertpeler bolsa, onda olardy jobaǵa engizemiz.