Bala ótkir ottegi jetispeýshiligi belgilerimen týǵan. Neonatolog dárigerler sábıdiń dem alýyn qalypqa keltirý úshin shuǵyl reanımasıalyq áreketterge kóshti. Tynys alýdy tolyǵymen qalpyna keltirý múmkin bolmady. Oǵan sebep, jańa týǵan sábı ókpesiniń eki jaqty qabynýy. Keıinnen anyqtalǵandaı, qursaqishilik tynys alý jetispeýshiligi júkti kezinde anasynyń ınfeksıasy balaǵa juqqandyǵy sebep bolǵan.
Sábı ózdiginen durys tynys ala almaǵandyqtan týǵannan bastap, Almaty qalalyq №4 perzenthanasynyń jańa týǵan sábılerge arnalǵan qarqyndy terapıa jaǵdaıynda, ókpeni jasandy jeldetý apparatynda jatty. Dárigerlerdiń aıtýynsha, bala jaqsy kórsetkishtermen týyldy. Onyń salmaǵy 3 keli 332 gram bolsa, boıy 53 sm boldy.
«Anasynyń aıaǵy aýyr kezde qan qysymy joǵary bolǵan jáne qaǵanaq sýynyń azdyǵynan zardap shekken. Infeksıa kezinde qannyń uıýy buzylyp, dene qyzýy kóterilgen jáne ishek jumysy buzylǵan. Qan uıýyn qalypqa keltirý úshin qannyń suıyq bóligi quıyldy. Sábı ózdiginen eme almaǵandyqtan, ómir súrý qalpyn saqtaý úshin qorektik zattar tamyr arqyly jiberildi. Bala uzaq ýaqyt boıy dárilik uıqyda bolyp ózdiginen dem ala almady. Ókpe men ishektegi qabyný prosesteri qaıtqannan keıin, tynys alýy birtindep qalypqa kele bastady», – dedi №4 perzenthananyń balalar bóliminiń meńgerýshisi Olga Kýdrávseva.
Týa bitken eki jaqty pnevmonıa bakterıa, vırýs nemese sańyraýqulaqtartan paıda bolady. Ol ınfeksıanyń anadan balaǵa uryqjoldas arqyly nemese bosaný kezinde juǵýy saldarynan týady.
Bosaný kezinde ottegi jetispeýshiligi, shala týý nemese anasynda basqa da medısınalyq máselelerdiń bolýy sıaqty faktorlar týa bitken eki jaqty pnevmonıanyń damý qaýpin arttyrady.
«Bul jaǵdaıda sábıdiń anasynda qasaǵa sýynyń azdyǵy bolǵan. Ol týa bitken eki jaqty ókpe qabynýy qaýpin arttyrýy múmkin. Uryq qabynyń erte jarylýy, plasentanyń máseleleri nemese ana aǵzasyna suıyqtyqtyń jetispeýi – uryqtyń ókpesi men basqa da aǵzalarynyń damýyna qajetti ottegi men qorektik zattardyń jetispeýine ákep soǵýy múmkin. Nátıjesinde, bala ınfeksıany jıi juqtyrady. Sondyqtan, júkti áıeldiń densaýlyǵyn baqylap, turaqty túrde tekserip otyrsa júkti kezdegi kez kelgen máselelerdi anyqtaýǵa bolady», – dep atap ótti Almaty qalasy №4 perzenthananyń bosaný bóliminiń akýsher-gınekolog dárigeri Indıra Kemalova.
Sonymen qatar, dárigerler mundaı jaǵdaıda emdeý uzaq ýaqyt alýy múmkin ekenin de atap ótti.
«Balanyń jaǵdaıy aýyr dep tanylǵan bolatyn. Anasyna psıhologıalyq qoldaý kórsetildi. Jaǵdaıy aýyr balalardy emdeý kezinde bizge ata-ananyń senim artýy mańyzdy. Bul kóbine emniń sátti bolýyna kómektesedi. Infeksıany jeńip shyǵýǵa anasynyń dárigerlerge degen senimi men úmiti oń yqpal etti», – dedi Almaty qalasy №4 perzenthana dırektorynyń orynbasary Ekaterına Samarseva.