Jazda jazǵy serýendeý, saıahattaý, tabıǵatta bolý kezinde kene shaǵý qaýpi artady
Kene adamǵa jabysady jáne anestetıkalyq zatty engizgendikten múldem aýyrtpaıdy. Ash kene óte kishkentaı – kóknár tuqymynyń mólsherindeı ǵana bolady, dep habarlaıdy Almaty-akshamy.kz.
Densaýlyq saqtaý mınıstrligi baspasóz qyzmetiniń málimetine súıensek, kene adamnyń denesinde 12 kúnge deıin jabysyp tura alady jáne osy ýaqyt ishinde dıametri 2 sm bolatyn shardyń mólsherine deıin ósedi.
Keıbir jaǵdaılarda keneler ensefalıt, kene súzegi, kene borrelıozy, Kongo-Qyrym gemorragıalyq qyzbasy sıaqty qaýipti aýrýlardyń tasymaldaýshysy bolyp, alergıalyq reaksıalar týdyratynyn este ustaǵan jón.
Eger kene shaǵyp alsa ne isteý kerek?
Eń durysy dereý dárigerlerge medısınalyq kómekke júginý kerek.
Birinshiden, keneni tolyǵymen óz betinshe alý múmkin emes. Keneniń basy julynyp, jaranyń ishinde qalýy múmkin.
Ekinshiden, em-shara kezinde keneni usaqtaýǵa bolady. Jándikterdiń ýy denege teri arqyly da enýi múmkin. Em-sharany júrgizýshige juqtyrý qaýpi bar.
Úshinshiden, eger siz keneni ózińiz alyp tastasańyz onyń juqtyrǵyshtyǵyn bilý múmkin bolmaıdy jáne ony tekserý úshin mamanǵa barý kerek.
Eger kene shaǵyp alǵannan keıin dene temperatýrasynyń joǵarylaýy, aýyrsyný, qatty bas aýrýy baıqalsa, dereý dárigermen keńesý kerek. Ózin-ózi emdeý qaıǵyly saldarǵa ákelýi múmkin.
Jándiktermen baılanysta bolýdan qalaı saqtanýǵa bolady? Tabıǵatqa (jaıylymǵa, egistikke jáne demalys oryndaryna) barǵan kezde jándikterdiń shaǵýynan qorǵaný quraldaryn (repellentterdi) ózińizben birge alyńyz.
Qatty, ashyq tústi kıimmen jaqsy kıinip, deneniń ashyq jerlerin (bet, moıyn, qol, tobyq) múmkindiginshe azaıtýǵa tyrysyńyz, jabyq aıaq kıim kıińiz.