Almatyda Naýryz merekesi 14 naýryzda Kóktóbe saıabaǵynyń aýmaǵynda ótken «Kórisý kúni» is-sharasynan bastaý alady.
Negizgi is-sharalar 21 naýryzda tańǵy saǵat 10:00-de Naýryz merekesine arnalǵan sherýden bastalady. Sherý Almaty qalasynyń ortalyq kósheleri – Abaı jáne Abylaı han dańǵyldarynyń boıymen ótip, Tóle bı kóshesine deıin barady. Merekelik is-sharaǵa barlyǵy 500 adam qatysady
21 naýryz kúni saǵat 11:00-de «Astana» alańynda «Naýryz-dýman» gala-konserti ótedi. Artıser sahnada ulttyq jáne álemdik mýzykalyq shyǵarmalardy oryndap, akterlerdiń jáne balalar ujymdarynyń qatysýymen teatrlandyrylǵan mýzykalyq qoıylym kórsetiledi.
22 naýryz kúni saǵat 17:00-de «Astana» alańynda jas oryndaýshylardyń qatysýymen Zhuldyzdy Almaty konserti ótedi.
21-22 naýryzdaǵy merekelik is-sharalar kezinde qala turǵyndary men qonaqtaryna barlyǵy 60 tonna naýryz kóje men baýyrsaq taratylatyn bolady.
18-24 naýryz aralyǵynda Panfılov jáne Jibek Joly kóshelerinde «Naýryz Fest» is-sharasy ótedi. Bul kúnderi sýretshiler men qolónershilerdiń kórmeleri uıymdastyrylyp, kelýshiler kilem toqý, jibek pen keramıkany boıaý, asyl tastardy kesý, bylǵarymen, aǵashpen, shyny jáne sazben jumys isteý tehnologıasymen tanysa alady. İs-shara aıasynda anımatorlardyń qoıylymdary, halyqtyq karaoke, bı fleshmoby, konkýrstar, estrada juldyzdarynyń qatysýymen jandy daýystaǵy konsert, syılyqtardyń utys oıyndary jáne basqa da sharalar ótkizý josparlanýda.
Abylaı han dańǵylynyń aýmaǵynda balalar alańy ornalasady. Bul alańda anımatorlar, sırk ártisteri, qýyrshaq teatrynyń akterleri óner kórsetedi jáne Murat Mutyrǵanovtyń shoýy men halyq ertegileri keıipkerleri qýyrshaqtarynyń qoıylymdary bolady. Sondaı-aq, bul alańda oıyn fıgýralary ornatylyp, tanymdyq baǵdarlamalar, otbasylyq jáne balalar oıyndary, estafetalar ótedi.
Arbalardaǵy 10 arnaıy sórede jáne shatyrlarda qolónershiler jármeńkesi men qoldanbaly óner kórmeleri uıymdastyrylady.
Tóle bı kóshesiniń boıynda Panfılov kóshesinen Nazarbaev dańǵylyna deıingi aralyqta sport aımaǵy ornalasatyn bolady. Munda «Asyq atý», «Jamby atý», «Arqan tartý», «Qol kúres», «Qazaqsha kúres», «Kókpar tartý», «Toǵyz qumalaq» sporttyq-oıyn-saýyq ulttyq jarystaryn ótkizý josparlanǵan.
«Alataý» dástúrli óner teatrynyń aýmaǵynda 21-23 naýryz aralyǵynda ártisterdiń ónerin jáne «Naýryz-dýman» teatrlandyrylǵan spektaklin kórsetý úshin arnaıy sahna ornatylyp, etnoqalashyq uıymdastyrylady. Munda qolónershilerdiń kórmeleri, sheberlik synyptary, fleshmobtar, qýyrshaqtar sherýi, sporttyq jarystar ótedi.
Sonymen qatar, dástúrli túrde qalanyń barlyq aýdandarynda 14-24 naýryz aralyǵynda saǵat 17:00-den 20:00-ge deıin merekelik is-sharalar uıymdastyrylyp, sahnada qazaq mýzykalyq fólklorynyń úzdik shyǵarmalary oryndalady.