Sońǵy aptada KVI boıynsha epıdemıologıalyq jaǵdaı aıtarlyqtaı nasharlady.
Almatyda epıdemıologıalyq tekserý nátıjeleri boıynsha naýqastar koronavırýsty juqtyratyn negizgi oryndar anyqtaldy. Mundaǵy tizimde saýda jáne tamaqtaný oryndary juqtyrý jóninen kósh bastaýda, dep habarlaıdy Almaty-akshamy.kz.
Sońǵy aptada KVI boıynsha epıdemıologıalyq jaǵdaı aıtarlyqtaı nasharlady. 23 shildeden bastap KVI-di táýliktik tirkeý 1 myńnan asty. 23 shildede – 1080 jaǵdaı, 24 shildede – 1191 jaǵdaı, 25 shildede – 1219 jaǵdaı anyqtaldy. Osylaısha, jyl basynan beri KVI-diń 72 696 jaǵdaıy tirkeldi, al aıdyń basynan 25 shildege deıin – 16 911 jaǵdaıy anyqtaldy.
Ótken aptada aldyńǵymen salystyrǵanda, KVI jaǵdaıynyń tirkelýi 1,2 esege – 5 483 jaǵdaıdan 6 818 jaǵdaıǵa deıin ósti, táýliktik ósim 1,3%-dy qurady. Sımptomdyq naýqastardyń úles salmaǵynyń artýy baıaýlap, 90% deńgeıinde qaldy.
Sońǵy 2 aptadaǵy jas quramyn taldaý boıynsha 1 jasqa deıingi balalardyń dert juqtyrýy 0,3%-ǵa artyp, 2,8%-dy kórsetti (ótken aptada 135 bolsa, taǵy 178 bala qosyldy). KVI derti 20 men 40 jas aralyǵyndaǵy jastar arasynda – 38%, 40 pen 59 jas aralyǵyndaǵy azamattar arasynda – 25% jáne 60 jastan asqan adamdar arasynda – 20% quraıdy. Qalǵan jastaǵylar adamdar arasynda aıtarlyqtaı ózgeris joq.
Halyqty jumyspen qamtý boıynsha sońǵy 14 kúnde ózin-ózi jumyspen qamtyǵandardyń – 41% (burynǵy deńgeıde), túrli JSHS, JK, AQ qyzmetkerleriniń – 18% (1% – ǵa ósý), zeınetkerlerdiń – 17,1% (1% – ǵa ósý), sondaı-aq oqýshylardyń – 9% (0,2%-ǵa tómendeý) jáne mektep jasyna deıingi balalardyń – 6,3% (burynǵy deńgeıde) KVI dertin juqtyrýy basym, bul jalpy sanynyń 91%-dan astamyn quraıdy.
Sońǵy aptada belgilengen juqtyrý oryndary boıynsha, aldyńǵymen salystyrǵanda, týystarmen jáne kórshilermen baılanys kezinde KVI juqtyrý deńgeıi 0,2 – 0,4%-ǵa artty.
Juqtyrý qaýpi joǵary oryndar boıynsha oramishilik azyq-túlik emes dúkenderde 0,1%-ǵa jáne qoǵamdyq tamaqtaný nysandarynda, meıramhanalar, kafe men asqanalarda – 0,2%-ǵa, monsha men saýnalarda – 0,4%-ǵa juqtyrý baıqaldy.
Sońǵy 7 kúnde KVI juqtyrýdyń negizgi oryndary saýda nysandary – 35%, otbasyndaǵy baılanystar – 19%, qoǵamdyq kólikte qatynaý – 16%, bazarlar - 14%, saıabaq pen halyq demalatyn jaıaý júrginshiler kósheleri – 3,6% qurady.
KVI taralýyna jol bermeý jónindegi shtab Almaty turǵyndaryn qazirgi qalyptasqan ahýalǵa jaýapkershilikpen qaraýǵa shaqyrdy. Karantındik shekteý men betperde rejımin qatań saqtaý qajet. Densaýlyqty qorǵaýdyń jalǵyz joly – vaksına alý. Osyǵan baılanysty qala turǵyndary belsendi túrde vaksına alyp, týystary men jaqyndaryn ekpe pýnktine yńǵaıly ýaqytta shaqyrýy kerek.
Jalpy, 1 aqpan men 26 shilde aralyǵynda I komponentpen 680 722 adam ekpe aldy. 60 jastan joǵary vaksına alǵan adam sany 95 813 adamdy quraıdy. Qalada medısınalyq uıymdarda, mektepterde, mádenıet, sport nysandarynda, bazar men qalanyń SOSO-da 212 vaksına pýnkti jumys isteıdi. 1 260 adam jumyldyrylǵan 308 ekpe brıgadasy jumys jasaýda.