Almatyda «Narkostop» jobasy aıasynda jastar arasyndaǵy nashaqorlyqtyń aldyn alý jáne onymen kúresý sharalary talqylandy
Sıntetıkalyq esirtki - bizdiń zamanymyzdyń qasireti. Bul týraly ÓKQ brıfıńinde Almaty qalasy Jastar saıasaty basqarmasynyń jastardy áleýmettendirý jáne jastar bastamalaryn qoldaý bóliminiń basshysy Nýrsýltan Bekkaırov málimdedi.
Nashaqorlyqtyń aldyn alý boıynsha «Narkostop» jobasy alǵash ret Almatyda 2021 jyly iske qosyldy.
Jobany Almaty qalasynyń Jastar saıasaty basqarmasy júzege asyrýda. Ol eki baǵytqa bólinedi. Birinshisi esirtkini qoldanatyndarǵa jáne táýeldilikten arylǵysy keletinderge baǵyttalǵan (call-ortalyq, táýeldilermen jasyryn jumys, olardyń ata-analary), ekinshi baǵyt - nashaqorlyqtyń aldyn alý (kontent óndirisi, demalys ortalyqtary, dárister, eriktilik, eńbek bırjasy). Jobanyń nysanaly aýdıtorıasy - jastar.
«Biz «Narkostop» jobasynyń tapsyrys berýshilerimiz. Búgin men sizderdi jastarymyz úshin salaýatty jáne qaýipsiz orta qurýǵa degen ortaq umtylysymyzǵa arnalǵan osy mańyzdy is-sharada kórgenime qýanyshtymyn. Búgingi urpaq kóptegen qıyndyqtar men qaýipke tap bolýda, olardyń ishindegi eń mańyzdylarynyń biri esirtkiniń taralýy. Bul tek jeke adamdarǵa ǵana emes, búkil qoǵamǵa áser etetin, kóptegen jastardyń ómiri men bolashaǵyna balta shabatyn másele», - dedi Nýrsýltan Bekkaırov.
Onyń aıtýynsha, Jastar saıasaty basqarmasy bul zulymdyqqa qarsy kúreste jaýapkershilikti óz moınyna alady. «Narkostop» jobasy jaı ǵana bastama emes - bul bolashaq urpaq aldyndaǵy olarǵa qaýipsiz jáne salaýatty bolashaqty qamtamasyz etý mindettemesi.
Brıfıńke qatysqan «Psıhıkalyq densaýlyq ortalyǵy» dırektorynyń narkologıalyq qyzmet jónindegi orynbasary Gúlmıra Ábdibaeva ótken jyly narkologtardyń esebinde 1100-den astam adam bolǵanyn habarlady. Onyń ishinde alǵash ret 276 adam tirkelse, olardyń qatarynda 18 jasóspirim bar. Ol atap ótkendeı, ortalyq qalalyq ákimdik, Bilim jáne Qoǵamdyq densaýlyq saqtaý basqarmalarymen, sondaı-aq polısıa departamentimen birlesip júzege asyrylatyn nashaqorlyqqa qarsy kúrestiń keshendi jospary júzege asyrylýda.
«Sıntetıkalyq preparattar sońǵy birneshe jylda keńinen taralyp ketti. Nashaqorlar arasynda «skorost, mefedron jáne basqa psıhoaktıvti zattar keńinen qoldanylady. Pasıentterimizge otbasylaryna qaıta oralýǵa, olardyń qoǵammen aralasýyna kómektesý úshin biz almastyrý terapıasyn qoldanamyz. Búgin osy baǵdarlama boıynsha bizde 29 pasıent ótýde. Olar kún saıyn tańerteń kelip, dári qabyldaıdy. Dárigerler men pasıentterdiń týystary búginde terapıanyń oń nátıjelerin kórip otyr», - dep atap ótti G. Ábdibaeva.