Almatyda esirtkige táýeldilikten ońaltýdan ótip jatqan adamdarǵa arnalǵan áleýmettik beıimdeý baǵdarlamasy iske qosyldy. Onyń maqsaty-burynǵy táýeldilerge emdeýden keıingi ómirdi qalpyna keltirýge, resıdıvti boldyrmaý jáne qoǵamǵa qaıta qosylýǵa kómektesý. Bul týraly Almatynyń óńirlik komýnıkasıalar qyzmeti alańynda ótken baspasóz konferensıasy barysynda belgili boldy.
Psıhıkalyq saýyqtyrý ortalyǵynyń narkologıalyq qyzmet jónindegi dırektorynyń orynbasary Roza Tatıevanyń aıtýynsha, kóptegen táýeldiler úshin narkologıadan shyǵý – qıyn joldyń tek bastamasy ǵana. Olar birqatar máselelerge tap bolady: qujattarynyń bolmaýy, bank shottarynyń buǵattalýy, áleýmettik baılanystar men eńbek daǵdylaryn joǵaltýy. Kóp jaǵdaıda olar qıyndyqtarmen betpe-bet qalyp, ári qaraı qalaı áreket etý kerektigin bilmeıdi.
«Adamdy táýeldilikten aryltý ǵana emes, oǵan keıingi ómirge qural berý de mańyzdy. Qolóner-bul jaı ǵana jumys emes, bul tirek jáne nusqaýlyq, aıaqqa turý múmkindigi», - deıdi maman.
Jańa baǵdarlama aıasynda qatysýshylar tájirıbeli sheberler men psıhologtardyń jetekshiligimen qolóner mamandyqtaryn ıgere alady. Bul tásil tek kásibı turǵydan ǵana emes, ózin-ózi tárbıeleýdi nyǵaıtady, mazasyzdyqty azaıtady, jańa salaýatty ádetterdi qalyptastyrady. Sonymen qatar, ujymda jumys isteý áleýmettenýge jáne jańa ómirlik jaǵdaılarǵa beıimdelýge yqpal etedi.
«Biz qolóner sabaqtary pasıentterge ómirdiń jańa maǵynasyn tabýǵa kómektesken sátti mysaldardy kórdik.Endi osy tájirıbeni júıeli túrde engizip, múmkindiginshe kóp adamǵa qoldaý kórsetýdi maqsat etýdemiz», - dep atap ótti «Narkostop» jobasynyń qoǵammen baılanys jónindegi volonteri Janna Nýrseıtova.
Qazirgi ýaqytta baǵdarlama iske asyrylyp jatyr, jáne alǵashqy qatysýshylar jańa ómirge qadam jasaýda. Reabılıtasıany aıaqtaı otyryp, olar tek medısınalyq jáne psıhologıalyq qoldaý ǵana emes, sonymen qatar jumysqa ornalasý múmkindigin de alady, bul olardyń qaıtadan táýeldilikke oralý qaýpin aıtarlyqtaı tómendetedi.
Almaty qalasynyń Psıhıkalyq densaýlyq ortalyǵynyń málimetine sáıkes, jyl saıyn reabılıtasıa júıesinen 500-den 800-ge deıin pasıent ótedi. Mamandardyń pikirinshe, áleýmettik beıimdelý men kásibı daıarlaýdyń jańa ádisterin engizý qaıtalaný qaýpin tómendetip, kóptegen adamdarǵa ómirdi qaıta bastaýǵa kómektesedi.