Qazaq kıno ónerinde esimi elge tanymal rejıser jáne senarıst Narıman Tórebaev 13 naýryzdan bastap Almatyda "Kúnder" atty jańa fılminiń túsirilimin bastady.
Týyndy ólimge ákeletin aýrý dıagnozy qoıylǵannan keıin ómiriniń tas-talqany shyqqan qarapaıym adam týraly baıandaıdy, dep habarlaıdy aqshamnews.kz.
Túsirilim jumystary sáýir aıynyń ortasyna deıin jalǵasady. Negizgi lokasıa - Almaty qalasy. Fılm Mádenıet jáne aqparat mınıstrliginiń qoldaýymen, sondaı-aq Ulttyq kınony qoldaý memlekettik ortalyǵynyń kómegimen túsirilýde. Kartına kelesi jyldyń basynda tolyǵymen aıaqtalyp, sodan keıin álemdik festıválderge jóneltiledi.
“Bul ózin-ózi joǵaltqan jannyń tragedıasy. Ol ómirindegi barlyq nárseden aıyrylyp, ózine jaqyn adamdardyń bárinen bas tartqan. Óler aldynda ol muny túsinýge tyrysady, biraq sátsizdikke ushyraıdy. Bul adam balasynyń óz baqytyn jalǵan zattarǵa almastyrýy týraly áńgime”, - deıdi rejıser Narıman Tórebaev.
Kartınanyń senarıi birneshe jyl buryn jazylǵan. Tórebaev atap ótkendeı, kez-kelgen rejıser, tipti eń radıkaldy avtorlyq bolsyn, óziniń kınosyn múmkindiginshe kóp adam kórgenin qalaıdy. Sondyqtan da ol bul fılm tek festıváldarda ǵana emes, sonymen qatar prokatqa da shyǵyp, strımıngterde kórsetiledi dep úmittenedi.
Basty rólde Bolat Shanın, al ekinshi planda otandyq kınematograftyń jańa juldyzdary - Shuǵyla Eshenova ("Sheker. Sońǵy múmkindik"), Shyńǵys Beıbituly ("Joshy han. Uly Ulystyń ámirshisi") jáne Eljan Turys («Jaýjúrek myn bala»).
“Men árqashan ózimdi osyndaı festıváldyq jobalarda synap kórgim kelgen, munda siz asyqpaı jumys isteısiz, munda bıznes emes, shyǵarmashylyq birinshi orynda. Rejıserdiń kózqarasy unady, onyń aktermen dıalogy bar. Dál osyndaı jobalarda akter shynalady, ósedi”, - dep atap ótti Beıbituly.
Fılmdi túsirýge Tórebaevqa onyń turaqty komandasy - operator Aıdar Musabekov, kompozıtor Ǵalymjan Sekeev jáne qoıýshy-sýretshi Alekseı Fılımonov kómektesýde.
Esterińizge sala ketsek, Tórebaevtyń aldyńǵy "Ol shaınekti satyp aldy" kartınasy Qazaqstannyń kınosynshylar Qaýymdastyǵynyń jyl saıynǵy "Synshylar tańdaýy 2024" syılyǵynda jeńimpaz atanyp, onda ol "Úzdik rejıser", "Úzdik montaj" jáne "Úzdik saýndtrek" nomınasıalarynda jeńiske jetken.