Qutqarý qyzmetimen birlesip, aýmaqty tazartý jáne qalpyna keltirý boıynsha jedel sharalar qabyldanyp jatyr.
Almatyda aýa temperatýrasynyń aýytqýyna baılanysty muz kóship, Esentaı ózeniniń jaǵalaýyndaǵy qorshaýdy buzyp ketti, dep habarlaıdy Almaty-akshamy.kz QazAqparatqa silteme jasap.
Onyń vıdeosy áleýmettik jelide tarady.
Qalalyq ákimdiktiń málimetinshe, ekologıa jáne qorshaǵan ortany qorǵaý basqarmasy aýdan ákimdiginiń qyzmetkerlerimen birlesip, atalǵan jerge shyqty. Tıisti tazalaý sharalary qabyldanatyn bolady.
«Aýa temperatýrasynyń aýytqýyna baılanysty Esentaı ózeniniń jaǵalaýynda muz kóship, qorshaýdy buzdy. Qalalyq ekologıa jáne qorshaǵan ortany qorǵaý basqarmasy, aýdan ákimdigi qyzmetkerleri Almaty qalasynyń Tótenshe jaǵdaılar departamenti jáne Qutqarý qyzmetimen birlesip, aýmaqty tazartý jáne qalpyna keltirý boıynsha jedel sharalar qabyldap jatyr», - dep atap ótti ákimdik.
Almaty qalalyq tótenshe jaǵdaılar departamentiniń málimetine sáıkes, 13 jeltoqsan kúni Esentaı ózeniniń boıynda ál-Farabı dańǵylynyń joǵary jaǵynda muz kóshken.
Saldarynan jaıaý júrginshiler kópiriniń qorshaýy búlindi.
«Qazseldenqorǵaý» memlekettik mekemesi jáne tótenshe jaǵdaılar departamentiniń qyzmetkerleri oqıǵa ornynda saraptama júrgizip jatyr.