2023 jylǵy 13 qańtarda, saǵat 11.00-de Ulttyq kitaphanada memleket jáne qoǵam qaıratkeri, mádenıettanýshy, Qazaqstannyń eńbek sińirgen qaıratkeri Murat Muhtaruly Áýezovtiń 80 jyldyq mereıtoıyna arnalǵan «Ótkirdiń júzi» atty kezdesý keshi ótedi, dep habarlaıdy Almaty-akshamy.kz.
Murat Áýezov – kórnekti qoǵam qaıratkeri, mádenıettanýshy-ǵalym, jazýshy, Qazaqstan Jazýshylar odaǵynyń múshesi, Qazaqstan Respýblıkasynyń eńbek sińirgen qaıratkeri.
Ol Qazaqstannyń jáne halqymyzdyń rýhanı mádenıetin damytýǵa, Ortalyq Azıa halyqtarynyń tarıhı-mádenı qundylyqtaryn zerdeleý men nasıhattaýǵa ólsheýsiz úles qosty. «Soros-Qazaqstan» qorynyń basshysy retinde bilim berý, mádenıet jáne qoǵamdy demokratıalandyrý salasyndaǵy birqatar mańyzdy ortalyqazıalyq jobalarǵa bastamashy boldy jáne júzege asyrdy, qazaq ádebıeti men Qazaqstannyń jas shyǵarmashylyq kúshteriniń damýyna úles qosty. Sondaı-aq «Mádenı mura» memlekettik baǵdarlamasyn júzege asyrýǵa, qazaq halqynyń tarıhı-mádenı murasyn zertteýge, saqtaýǵa jáne jańǵyrtýǵa orasan zor úles qosty.
Qazaqstan tarıhynda Qazaqstannyń Qytaı Halyq Respýblıkasyndaǵy tuńǵysh Tótenshe jáne Ókiletti Elshisi boldy. Qazaq mádenıetin, ónerin, ádebıetin nasıhattaýǵa baǵyttalǵan «Jas tulpar» beıresmı jastar qozǵalysyn uıymdastyrýshylardyń biri. «Jibek jolyndaǵy suhbattar» halyqaralyq mádenı jobasynyń bastamashysy jáne jetekshisi, «Ýaqyt arqaýy», «M.M.Áýezov» teleesse telebaǵdarlamalarynyń avtory jáne júrgizýshisi boldy.
«Vremen svázýıýshaıa nıt» (1972), «Ippokrena. Hojdenıa k kolodsam vremen» (1997), «Ýıtı, chtoby vernýtsá» (2002), «Glavpochtampt» (2018), «Dilim» (2018) eńbekteri men kórkemdik prosestiń teorıasy men tájirıbesi boıynsha 200-den astam jarıalanymdardyń avtory.
İs-sharanyń maqsaty – Murat Áýezovtiń ómiri men shyǵarmashylyǵyn úlgi ete otyryp jáne urpaqtar sabaqtastyǵyn saqtaı otyryp, jastar arasynda rýhanı-mádenı jáne jalpyadamzattyq qundylyqtardy nasıhattaý.
Kezdesý aıasynda QR Ulttyq kitaphanasy qorynan Murat Áýezovtiń qyzmeti men shyǵarmashylyǵyna arnalǵan «Ótkirdiń júzi» atty kitap kórmesi uıymdastyrylady.