Búginde ekpe alǵan almatylyqtardyń sany 1 mıllıonǵa jýyqtap qaldy.
Koronavırýs múgedektigi bar adamdar úshin asa qaýipti. Sondyqtan aýrýdyń aldyn alyp ekpe salǵyzý kerek, dep habarlaıdy Almaty-akshamy.kz Almaty.tv silteme jasap.
Ulan İńkárbaev Almatydaǵy múmkindigi shekteýli jandar arasynda alǵashqylardyń biri bolyp ekpe salǵyzǵan. Týǵanynan serebraldy sal aýrýymen aýyratyn, Bostandyq aýdany múgedekter qoǵamynyń basshysy osylaısha vaksınanyń esh qaýpi joq ekenin kórsetkisi keledi.
«Ekpeni alý kerek. Óıtkeni ol adamdar ony tegin alyp jatyr, esh kezek joq, múmkindik bar. Endi nege almasqa? Kerisinshe, aýrýǵa tez shaldyǵatyn adamdar birinshi kezekte alýy kerek», - deıdi qala turǵyny Ulan İńkárbaev.
Álemde saǵatyna koronavırýstan 236 adam, táýligine shamamen 6 myń adam kóz jumady eken. Vaksına qaıǵyly statısıkanyń bir bóligi bolýdan saqtaıdy. Al dárigerlerdiń aıtýynsha, múgedektik nemese sozylmaly aýrýlardyń bolýy ekpe salǵyzýǵa qatań shekteý bola almaıdy. Mamandar ár jaǵdaıǵa jiti taldaý jasap, tolyq teksergennen keıin ǵana egý pýnktine jiberedi.
«Úzildi-kesildi ekpe alýǵa bolmaıdy degen nárse joq. Búırek aýrýlary, qurysý sındromy bar aýrýmen aýyratyndarǵa, jaqynda ǵana ınsýlt, ınfarkt alǵandarǵa ázirshe ekpe almaı qoıa turý kerek. Alaıda densaýlyǵy jaqsaryp,ońaltý kezeńinen ótkennen keıin dáriger qabyldaýyna barǵan jón. Ábden teksergennen keıin, esh alańsyz ekpe salǵyzýǵa bolady», - deıdi № 12 qalalyq emhananyń pedıatr-dárigeri Svetlana Postnova.
Búginde ekpe alǵan almatylyqtardyń sany 1 mıllıonǵa jýyqtap qaldy. 930 myńnan astam adam vaksınanyń birinshi komponentin alsa, 823 myńnan astam adam ekinshi dozasyn salǵyzǵan. Megopolıste 160 vaksınasıa pýnkti jumys isteıdi. 237 vaksınasıa brıgadasynda 1 028 medısına qyzmetkeri jumyldyrylǵan.