Qalada múgedek adamdardyń sany jyl saıyn orta eseppen 3% artýda.
1350 múgedek adamdy jumyspen qamtý úshin 775 mln teńge bólý josparlanýda. Bul týraly shahar jetekshisi Erbolat Dosaev Almatynyń qalasynyń 2023-2025 jyldarǵa arnalǵan búdjet jobasyn qaraý barysynda aıtty, dep habarlaıdy Almaty-akshamy.kz.
Erbolat Dosaevtyń aıtýynsha, halyqtyń áleýmettik osal toptaryna jáne erekshe qajettilikteri bar adamdarǵa jan-jaqty qoldaý kórsetý qalanyń basym mindeti bolýy tıis.
«Búginde halyqtyń 240,5 myń osal tobyna 26 mlrd teńgege áleýmettik qoldaý kórsetildi. Qalamyzda múgedek adamdardyń sany jyl saıyn orta eseppen 3 prosentke artýda, al balalar arasynda bul kórsetkish 6,8%-ke ósýde», - dedi Erbolat Dosaev.
Múgedektiktiń aldyn alý maqsatynda 2023 jyly jyl saıyn 950 mamandy oqyta otyryp, 600 mln.teńge somasyna Erte aralasý ortalyǵyn qurý boıynsha pılottyq jobany iske qosý josparlanýda.
«Kelesi jyldan bastap meniń bastamam boıynsha Almaty qalasynyń ákimdigi 200 múgedek balany elektr jetegi bar joǵary sapaly jeke kreslo–arbalarmen qamtamasyz etýdiń arnaıy baǵdarlamasyn iske asyrýdy, sondaı-aq 1,4 mlrd. teńge somasyna 170 adamdy jańa tehnologıalar boıynsha protezdik-ortopedıalyq quraldarmen jáne súıek ótkizgishtigi bar estý apparattarymen, sóıleý prosesorlarymen qamtamasyz etýdi josparlap otyr»,- dedi qala ákimi.
Onyń aıtýynsha, bul shara áleýmettik qyzmetter portalynda joq ońaltýdyń joǵary tehnologıalyq quraldaryn tolyqtyrýǵa jáne osy maqsatqa qarjylandyrý kólemin 8,2 mlrd. teńgege deıin jetkizýge múmkindik beredi.