№ 208 mektep-gımnazıa bazasynda uıymdastyrylǵan is-sharaǵa júzge jýyq alǵashqy áskerı daıyndyq jáne basqa pánderdiń muǵalimderi qatysty, dep habarlaıdy aqshamnews.kz.
Pedagogtardy qoldaýǵa Naýryzbaı aýdany bilim bóliminiń basshysy Saltanat Qusaıynova, «Jas sarbaz» «balalar-jasóspirimder áskerı-patrıottyq qozǵalysy» RQB Almaty fılıalynyń jetekshisi zapastaǵy podpolkovnık Marat Qanatov jáne Almaty qalasy boıynsha «Taýly Qarabaq ardagerleri men múgedekteriniń respýblıkalyq odaǵy» RQB ókili Ermek Shyńǵysov keldi.
Almaty qalasy Naýryzbaı aýdanynyń qorǵanys isteri jónindegi basqarmasy men Bilim bólimi uıymdastyrǵan is-shara Desanttyq-shabýyldaý áskerleri áskerı qyzmetshileriniń qoıan-qoltyq urys tásilderin kórsetýimen bastaldy.
– Biz mundaı jarystardy jyl saıyn ótkizip turamyz. Bul alǵashqy áskerı daıyndyq oqytýshylary arasynda pedagogıkalyq sheberlikti arttyrýǵa jáne tájirıbe almasýǵa yqpal etedi, – dedi Almaty qalasy Naýryzbaı aýdany qorǵanys isteri jónindegi basqarmasynyń tárbıe jáne ıdeologıalyq jumys bóliminiń bastyǵy leıtenant Maqsat Ájihanov.
Estafeta AK-74 avtomatyn tolyq bólshektep-jınaý, qarýdyń oqjataryn oqý patrondarymen jabdyqtaý, jalpy áskerı qorǵanys jıyntyǵyn kıý, pnevmatıkalyq myltyqtan nysana kózdeý jáne medısınalyq-sanıtarlyq daıyndyq tapsyrmalarynan turdy.
Jarys qorytyndysy boıynsha birinshi oryndy Raqym Sársenbın atyndaǵy № 192 jalpy bilim beretin mektep muǵalimderi, ekinshi oryndy № 174 mektep-gımnazıa komandasy ıelendi. Úshinshi oryndy № 176 mektep-gımnazıasy men № 187 jalpy bilim beretin mektep ózara bólisti.
Jarystyń jeńimpaz komandasy men júldegerleri kýboktarmen, qurmet gramotalarymen jáne baǵaly syılyqtarmen marapattaldy.