Qazirgi ýaqytta eki dońǵalaqty kólik urlyǵyna 38 jastaǵy F. esimdi azamattyń qatysy bar ekendigi belgili boldy, dep habarlaıdy Almaty-akshamy.kz.
«Túngi ýaqytta zańsyz baıý maqsatynda kúdikti kópqabatty úıdiń aýlasynda qaraýsyz qaldyrylǵan mopedterdi izdegen. Sóıtip, Mamyr-3 yqshamaýdanynda skýter men mopedti urlap úlgergen. Keıin kúdikti kólik quraldaryn qaıta satpaq bolǵan, alaıda úlgermegen. Urlanǵan kólik tárkilenip, aıǵaqty zat retinde qylmystyq is materıaldaryna tirkeldi. F. esimdi azamattyń buryn da osyǵan uqsas qylmystar úshin birneshe ret isti bolǵany belgili boldy. Biraq ol durys qorytyndy shyǵarmaı, qaıtadan eski ádetin qolyna alǵan. Qazir QR QK-niń 188-baby 3-bóligi boıynsha tergeý amaldary júrgizilip jatyr», – dedi Áýezov aýdandyq polısıa basqarmasynyń bastyǵy Ulan Ábilqaıyr.
QR QPK-niń 201-babyna sáıkes ózge aqparattar tergeý múddesine oraı jarıalaýǵa jatpaıdy. QR Konstıtýsıasynyń 77-babynyń 3-tarmaǵynyń 1-tarmaqshasyna jáne QR QPK-niń 19-baby 1-bóligine sáıkes, zańdy kúshine engen sot úkimimen belgilengenge deıin árbir adam qylmystyq quqyq buzýshylyq jasaýda kinásiz dep tanylady.