Konferensıa materıaldary elektrondy jınaq retinde jaryqqa shyǵady
2022 jyldyń 28 qyrkúıeginde M.O. Áýezovtiń dúnıege kelgenine 125 jyl tolýyna arnalǵan «M.O. Áýezov murasy jáne álemdik órkenıet» atty Halyqaralyq ǵylymı-praktıkalyq konferensıa jáne 29 qyrkúıekte «Muhtar Áýezov jáne Jańa Qazaqstan: rýhanı mádenıettiń qoǵamdyq sanany damytýdaǵy róli» atty respýblıkalyq dóńgelek ústel ótedi, dep habarlaıdy Almaty-akshamy.kz.
Sharanyń maqsaty – uly jazýshynyń álemdik órkenıet pen adamzat aqyl-oıyndaǵy orny men rólin aıqyndaý, qazaq jáne álem ádebıetiniń ádebı baılanysyn nyǵaıtý, qazaq ádebıetiniń damý úrdisteriniń tarıh jáne búginin saralaý, qalamger murasyndaǵy Alash paradıgmasy, jalpy adamzattyq qundylyqtarǵa negizdelgen ozyq ıdealaryn óskeleń urpaqtyń boıyna sińirý.
Uly jazýshyny eske alý sharasy M.O. Áýezov qabirine Quran oqyp, eskertkishine gúl shoqtaryn qoıý rásimimen bastalyp, «Dostyq úıi» Májilis zalynda ótetin konferensıamen jalǵasady.
Konferensıaǵa Reseı, Ózbekstan, Qyrǵyz Respýblıkasy, Ázerbaıjan, Reseı, Majarstan, Nıderlandy jáne basqa elderdiń jetekshi ǵalymdary, otandyq ǵylym sańlaqtary men ınstıtýtymyzdyń ǵylymı qyzmetkerleri, oqytýshylar men jas ǵalymdar qatysady.
Konferensıa materıaldary elektrondy jınaq retinde jaryqqa shyǵady.
Sharany uıymdastyrýshylary: Qazaqstan Respýblıkasy Ǵylym jáne joǵary bilim mınıstrligi Ǵylym komıtetiniń M.O. Áýezov atyndaǵy Ádebıet jáne óner ınstıtýty, TÜRKSOY halyqaralyq uıymy, Halyqaralyq Túrki akademıasy, Qazaqstan jazýshylar odaǵy, Almaty q. Ákimdigi.
«M.O. Áýezov murasy jáne álemdik órkenıet» atty Halyqaralyq ǵylymı-praktıkalyq konferensıasy «Dostyq úıi» májilis zalynda (Almaty q., Qurmanǵazy k-si, 40) ótedi.