KIMEP ýnıversıtetinde QR Qorǵanys mınıstrliginiń 23 áskerı qyzmetshisiniń "Mini-MBA" baǵdarlamasy boıynsha oqýdy sátti aıaqtaǵany týraly sertıfıkattar tabys etilýine oraı saltanatty is-shara ótti.
Oǵan Qorǵanys mınıstriniń orynbasary Ásker Beısenov pen Qorǵanys mınıstriniń keńesshisi Aıgúl Tólembaeva qurmetti qonaq retinde qatysty, dep habarlaıdy Almaty-akshamy.kz Qorǵanys mınıstrligine silteme jasap.
Aıta ketý kerek, bul ózara árekettestiktiń alǵashqy mysaly emes. Qorǵanys mınıstrligi KIMEP ýnıversıtetimen 2015 jyldan beri tyǵyz qarym-qatynas jasap keledi. 2016 jyly KIMEP-tiń basshy kadrlarǵa arnalǵan İskerlik ákimshilendirý magıstratýrasynyń baǵdarlamasyn 10 ofıser sátti bitirgen bolatyn. Búgingi tańda olar qorǵanys vedomstvosynyń Ortalyq apparatynda basshylyq qyzmetter atqaryp júr.
Ofıserlerdiń aıtýynsha, sabaqtar naqty keısterdi jáne álemdik naryqtyń úzdik sarapshylary men bilgirleriniń baı tájirıbesin paıdalana otyryp, óte nátıjeli ótken. Kýrs 2023 jylǵy 23 maýsymdaǵy Qorǵanys mınıstrligi men "KIMEP ýnıversıteti" KEAQ arasyndaǵy azamattardy áskerı-patrıottyq tárbıeleý jáne áskerı bilim berý salasyndaǵy yntymaqtastyq týraly kelisimge sáıkes uıymdastyryldy. Oqytý Ulttyq qorǵanys ýnıversıteti bazasynda "KIMEP ýnıversıteti" KEAQ profesorlyq-oqytýshylar quramynyń basshylyǵymen 2023 jyldyń qyrkúıeginen 2024 jyldyń aqpanyna deıin óteýsiz negizde júrgizildi.
"Mini-MBA" baǵdarlamasy Qazaqstanda 7 jylǵa arnalǵan Foundation for International Business Administration Accreditation (Bonn, Germanıa) halyqaralyq akredıtasıasyn eki ret alǵan jalǵyz baǵdarlama. Baǵdarlama 2012 jyly Menedjment, kásibı daǵdylar jáne bıznes quzyrettiligi boıynsha negizgi bilim alý maqsatynda iske qosyldy.