30 mamyr kúni saǵ. 10:00-de «Saryarqa» jáne «Baýyrjan Momyshuly» metro stansıalary iske qosylady. Olar qazirgi qyzmet kórsetip turǵan toǵyz stansıanyń jalǵasy retinde qala ortalyǵyn jatyn aýdandarmen baılanystyrady dep habarlaıdy almaty-akshamy.kz
Eki jańa stansıa iske qosylǵannan keıin metro jelisiniń jalpy uzyndyǵy 3,1 shaqyrymǵa uzaryp, endi 13,4 shaqyrymdy quraıtyn bolady. Jeli boıyna 7-10 mınýt saıyn júretin tórtvagondy 15 elektr poıyzyn jiberý josparlanǵan.
Qazirgi tańda metro kúnine 45 myńǵa jýyq jolaýshy tasymaldaıdy. Jańa stansıalar iske qosylǵannan keıin bul kórsetkish kúnine 85 myń jolaýshyǵa deıin ósedi dep kútilýde.
«Máskeýden» keıingi «Saryarqa» stansıasy Abaı dańǵyly boıynda Altynsarın dańǵyly men Saın kósheleriniń aralyǵynda Family Park mańynda ornalasqan. Tereń salynǵan, eki kireberisi men bir vestıbúli bar. Stansıada eki jedelsaty men segiz eskalator ornatylǵan. Interer jasaý kezindegi negizgi ıdeıa – Saryarqanyń sheksiz keń dalasynyń ásemdigin kórsetý. Qabyrǵalary mármár tastardan qurastyrylyp, granıtpen órnektelgen. Shetki jaǵyndaǵy qabyrǵada jazyq dalanyń ústinen shyǵyp kele jatqan kún, onyń bergi jaǵynda Qazaqstan astanasy beınesi mańynda shaýyp kele jatqan júırik attar beınelengen panno ornatylǵan.
«Baýyrjan Momyshuly» stansıasy Abaı dańǵyly boıynda Momyshuly kóshesiniń batysynda ornalasqan. Taıaz ornalasqan, eki vestıbúl men alty kireberisi bar. Stansıada alty jedelsaty men on bes eskolator ornatylǵan. Platforma uzyndyǵy 108 m. Almaty metro jelisiniń on birinshi stansıasy ázirge sońǵy stansıa bolyp sanalady.
Stansıa úlken turǵyn alabynyń ortasynda ornalasqan. Qabyrǵalar men tireýishterdi bezendirý úshin ashyq reńkti marjan-sur tústi aǵash tektes keramıkalyq panelder, al edendi qaptaýǵa – ashyq sur tústi tabıǵı granıt paıdalanylǵan.
Bolashaqta «Qalqaman» stansıasy qurylysyn aıaqtap, metrony batys baǵytta «Barlyq» bazaryna deıin damytý josparlanǵan.