Mamyr merekeleri qarsańynda Almaty qalasynyń kóshi-qon qyzmeti “Azamattarǵa arnalǵan úkimet” memlekettik mekemesi jáne Jetisý aýdany ákimdigimen birlesip, 16 jastaǵy qala turǵyndaryna alǵashqy jeke kýálikterdi saltanatty túrde tabystaý rásimin uıymdastyrdy, dep habarlaıdy aqshamnews.kz Polisia.kz-ke silteme jasap.
Shara halyqqa qyzmet kórsetý ortalyǵynda jyly, merekelik jaǵdaıda ótti. Jas almatylyqtardy memlekettik organdardyń ókilderi quttyqtap, azamattardy ýaqytyly qujattandyrýdyń mańyzdylyǵyn atap ótti.
— 16 jasta jeke kýálik alý - azamattyq jaýapkershilik jolyndaǵy mańyzdy qadam. Qujat bilim alýǵa, medısınalyq jáne áleýmettik qyzmetterge qol jetkizýge, jumysqa ornalasýǵa jáne qoǵam ómirine qatysýǵa múmkindik beredi. Ata-analar men zańdy ókilderdi qujattaryn rásimdeýdi keshiktirmeýge shaqyramyz. Jasóspirimderdiń ýaqytynda qujattanbaýy birqatar qıyndyqtar men shekteýlerge ákelýi múmkin, - dedi Almaty qalalyq PD kóshi-qon qyzmeti basqarmasy bóliminiń bastyǵy Janna Jaqypbaeva.
Sharany uıymdastyrýshylar mundaı sharalar jastardyń quqyqtyq saýattylyǵyn arttyryp, óskeleń urpaqtyń boıynda patrıottyq rýhty nyǵaıtýǵa septigin tıgizetinine senim bildirdi.