Almaty qalasynda memlekettik qyzmetter jármeńkesi uıymdastyrylyp, myńnan astam qala turǵyny mamandardan keńes aldy.
Bul is-sharany Medeý aýdanynyń ákimdigi men QR Memlekettik qyzmet isteri agenttigi uıymdastyrdy, dep habarlaıdy aqshamnews.kz.
Jármeńke megapolıs turǵyndaryna bir alańda túrli memlekettik qyzmetter týraly aqparat alýǵa múmkindik berdi.
İs-sharanyń ótetin orny kezdeısoq tańdalǵan joq. Kók bazar – qaladaǵy eń kóp baratyn oryndardyń biri, al bizge múmkindiginshe kóp adamdy aqparattandyrý mańyzdy boldy. Mamandardyń halyqpen kezdesýi Memlekettik qyzmet isteri agenttiginiń bastamasymen uıymdastyryldy. Jármeńkege 30 memlekettik organ qatysyp otyr.
"Jalpy, akımatqa qala turǵyndary túrli máseleler boıynsha jıi júginedi: múlikti zańdastyrý jáne rásimdeý, áleýmettik qyzmetter alý. Komýnaldyq qyzmetter boıynsha da birqatar suraqtar bar, sondyqtan biz is-sharaǵa «Almaty sý» MKK ókilderin shaqyrdyq. Bizdiń aýdannyń turǵyndary ýaqtyly aqparat alyp, sapaly memlekettik qyzmetter alýy mańyzdy. Medeý aýdanynda shamamen 230 myń adam turady, onyń ishinde shamamen 30 myń zeınetker, 3 myńǵa jýyq múgedek, shamamen 2,5 myń kópbalaly ana bar", – dedi Medeý aýdany ákiminiń orynbasary Aıdos Nurlybaev.
İs-sharaǵa HQKO, AHAT, áleýmettik qamsyzdandyrý bólimi, Almatynyń mansap ortalyǵy jáne basqa da mekemelerdiń ókilderi qatysty.
Almatylyq Saltanat Janalıeva mektep jáne turǵyn úı berý máseleleri boıynsha birqatar suraqtarǵa jaýap aldy.
- Bilikti mamandardan tolyq keńes aldym, jaýaptarǵa rızamyn. Barlyǵy túsinikti, rahmet. Mundaı is-sharalar halyq úshin paıdaly dep esepteımin, ásirese ýaqyt únemdeý turǵysynan tıimdi. Qazir bir jerde birneshe memlekettik organ shoǵyrlanǵan, sonyń arqasynda óz máselelerimdi bir saǵatqa jetpeıtin ýaqytta sheship aldym, al memlekettik mekemelerdi jeke-jeke aralaý bir kúnge sozylady, – dep bólisti óz pikirin turǵyn.
Memlekettik qyzmet isteri agenttigi departamentiniń memlekettik qyzmetterdi basqarý basqarmasynyń basshysy Maqsat Jańbyrshıev halyqpen kezdesý «Estýshi memleket» tujyrymdamasyn iske asyrý aıasynda ótkizilip jatqanyn atap ótti.
Aıta keteıik, bul bıylǵy jyly ótkizilgen altynshy memlekettik qyzmetter jármeńkesi. Uıymdastyrýshylardyń aıtýynsha, qalanyń ártúrli aýdandarynda osyndaı taǵy eki is-shara ótkizý josparlanýda