Keshke arnaıy shaqyrylǵan Muqaǵalı Maqataevtyń balalary aqyn týraly estelikterimen bólisti
Búgin qazaq poezıasynyń hantáńiri Muqaǵalı Maqataevtyń týǵanyna 92 jyl. Osyǵan oraı QR Prezıdentiniń janyndaǵy Memlekettik basqarý akademıasynyń Almaty qalasy boıynsha fılıalynda memlekettik qyzmetshiler arasynda «Jyrlaıdy júrek» ádebı-jyr keshi uıymdastyryldy, dep habarlaıdy Almaty-akshamy.kz.
Poezıa keshine fılıalda bilim alatyn qaıta daıarlaý kýrsynyń jáne biliktilikti arttyrý semınarlarynyń tyńdaýshylary jáne birqtar memlekettik organnyń qyzmetshileri qatysty. Akademıanyń Almaty qalasy boıynsha fılıalynyń dırektory Aıgerim Abılovanyń aıtýynsha, ádebı shara memlekettik qyzmetshiler arasynda aqynnyń shyǵarmashylyǵyn nasıhattaý maqsatynda ótken.
«İs-shara memlekettik qyzmetshiler arasynda aqyn shyǵarmalaryn keńinen dáripteý arqyly olardyń qazaq halqyna, ana tilimizge, Otanǵa degen súıispenshilik sezimderin odan ári damytyp, rýhanı qundylyqtardy nasıhattaý maqsatynda uıymdastyryldy. Keshke arnaıy shaqyrylǵan Muqaǵalı Maqataevtyń balalary aqyn týraly estelikterimen bólisti. Shyǵarmashylyǵyn zerttegen mamandar muzbalaq aqynnyń eńbekterine ǵylymı-zertteýler turǵysynan jáne halyqaralyq deńgeıde de joǵary baǵa berilgenin aıtty. Sonymen qatar poezıamen áýestenetin memlekettik qyzmetshiler ózderi jazǵan shyǵarmalarymen bólisip, ónerli jastar men búldirshinder óleńderin oqydy, dástúrli ánshiler dombyramen ánderin shyrqady», – dedi fılıal dırektory.
Poezıa keshine arnaıy qonaq retinde aqynnyń uly Juldyz Maqataev jáne Muqaǵalı Maqataev atyndaǵy halyqaralyq qoǵamdyq qordyń tóraıymy, kelini Baqytgúl Aıdarova, Almaty qalasy Mádenıet basqarmasynyń Mádenı-kópshilik is-sharalar uıymdastyrý bóliminiń basshysy Arman Halbekov, «Maqataev shyǵarmalarynyń psıhologıalyq aspektileri» taqyrybynda doktorlyq jumysyn qorǵaǵan PhD psıhologıa ǵylymdarynyń doktory, M. Maqataevtyń óleńderin aǵylshyn tiline aýdarǵan, Abylaı han atyndaǵy Qazaq halyqaralyq qatynastar jáne álem tilderi ýnıversıtetiniń qaýymdastyrylǵan profesory Tileýbaeva Merýert shaqyryldy. Shara Almaty qalasy Mádenıet basqarmasymen birlesip uıymdastyryldy.