Almatyda «Jalpyǵa birdeı bilim berý» qorynan 15 myńnan astam oqýshy tólem alady
Almatyda «Mektepke jol» aksıasy aıasynda beı-jaı qaramaıtyn qala turǵyndary men kásipkerler balalarǵa qalaı kómektese alatyndyǵy aıtyldy, dep habarlaıdy aqshamnews.kz
Almatyda «Mektepke jol» respýblıkalyq aksıasy bastaldy. Qalanyń bilim basqarmasynyń aqparaty boıynsha aksıa 30 qyrkúıekke deıin jalǵasady, osy ýaqyt ishinde «Jalpyǵa birdeı bilim berý» qorynyń, demeýshiler men mesenattardyń búdjet qarajaty esebinen muqtaj oqýshylarǵa kómek kórsetiledi.
Aksıanyń maqsaty – az qamtylǵan otbasylardan shyqqan oqýshylarǵa, jetim balalarǵa, sondaı-aq ata-anasynyń qamqorlyǵynsyz qalǵan balalarǵa oqý jylynyń basyna daıyndyq kezinde materıaldyq qoldaý kórsetý jáne áleýmettik sebeppen balalardyń mektepke kelmeýiniń aldyn alý.
Halyqtyń áleýmettik osal tobynan 15 myńnan astam bala 55 myń teńge kóleminde kómek alady. Qarajat jergilikti búdjetten qarjylandyrylatyn «Jalpyǵa birdeı bilim berý» qorynan bólinedi, aqsha mektep formasy men keńse jabdyqtaryn satyp alýǵa baǵyttalady.
Kimderdiń kómek alýǵa quqyǵy bar:
• memlekettik ataýly áleýmettik kómek (AÁK) alýǵa quqyǵy bar otbasylardan shyqqan balalar
• jan basyna shaqqandaǵy ortasha tabysy eń tómengi kúnkóris deńgeıinen tómen memlekettik AÁK almaıtyn otbasylardan shyqqan balalar,
• jetim balalar jáne ata-anasynyń qamqorlyǵynsyz qalǵan balalar,
• tótenshe jaǵdaılar saldarynan shuǵyl kómekke muqtaj otbasylardan shyqqan balalar,
• bilim berý uıymynyń alqaly organy aıqyndaıtyn oqýshylar men tárbıelenýshilerdiń ózge de sanattary.
Kómek alý úshin joǵaryda atalǵan bes sanattyń birin basshylyqqa alyp, balanyń oqý orny boıynsha mektepke ótinish jazý qajet.
Balanyń ata-anasy nemese zańdy ókili egov.kz elektrondyq úkimet portaly arqyly nemese halyqty jumyspen qamtý ortalyǵyna ótinish beredi. Ózge jaǵdaıda – bilim berý uıymyna rastaıtyn qujattardy usyný qajet.
Joǵaryda atalǵan sanattarǵa jatpaıtyn oqýshylar «Mektepke jol» respýblıkalyq aksıasy aıasynda demeýshiler men mesenattar esebinen kómek ala alady. Demeýshiler, mesenattar jáne balalarǵa kómek kórsetkisi keletin qalanyń barlyq qamqor turǵyndary aýdandyq bilim bólimderine júgine alady.
Aksıa týraly qosymsha aqparatty myna jedel jeli telefondary arqyly bilýge bolady:
• Alataý aýdany: 8 708 970 50 42,
• Almaly aýdany: 8 707 544 20 89,
• Áýezov aýdany: 8 702 327 36 69,
• Bostandyq aýdany: 8 777 280 66 50,
• Jetisý aýdany: 8 708 935 94 98,
• Medeý aýdany: 8 775 919 40 00,
• Naýryzbaı aýdany: 8 775 401 45 46,
• Túrksib aýdany: 8 701 615 49 78.