Almaty qalasynyń Bilim basqarmasyna qarasty KMQK «№84 bóbekjaı-balabaqshasynda» «Mektepke deıingi tárbıe men oqytý uıymdaryndaǵy jobalyq qyzmet» taqyrybynda respýblıkalyq ǵylymı-ádistemelik konferensıa uıymdastyryldy, dep habarlaıdy aqshamnews.kz
Konferensıanyń maqsaty – mektepke deıingi bilim berý salasynda ekologıalyq tárbıe boıynsha jobalyq qyzmettiń ozyq tájirıbelerin kórsetý, tájirıbe almasý jáne pedagogıkalyq qaýymdastyqta ekologıalyq tárbıe máselelerin talqylaý. Konferensıada ınovasıalyq ádister men tehnologıalar usynylyp, qatysýshylarǵa teorıalyq jáne praktıkalyq turǵyda bilim men daǵdylar beriledi.
Konferensıanyń mańyzdy sátteri:
- Jańa jobanyń prezentasıasy: Sıngapýr tájirıbesi negizinde qaldyq zattarǵa ekinshi ómir syılaý jáne ekologıalyq tárbıeni damytý;
- Tárbıelenýshiler men uıymdastyrylǵan is-áreketterdi kórsetý;
- Sheberlik synyptary;
- Balabaqsha ishinde balalardyń erkin oınaıtyn ortalyqtaryn uıymdastyrý boıynsha ekskýrsıalar;
- Jobalyq qyzmetti uıymdastyrý boıynsha pikir almasý;
- Pedagogtardyń tájirıbe almasýy.
Konferensıanyń qonaqtary men qatysýshylary:
- Balalardy erte damytý ınstıtýtynyń ókilderi;
- Qyzylorda oblysynyń bilim basqarmasynyń Qarmaqshy aýdany boıynsha bilim bóliminiń bilim berýdi damytý sektorynyń bas mamany – Almaganbetova Hatıra Arýbaevna;
- Astana, Ulytaý oblysy, Túrkistan oblysyndaǵy mektepke deıingi uıymdarynyń basshylary men tárbıeshileri, ádiskerleri jáne sala mamandary.
Konferensıanyń mańyzdy bólimi retinde Almaty qalasynyń «Balaýsa» balabaqshasynyń meńgerýshisi Jaısanbaeva Akerke Saǵynyshqyzy 2023 jyly Sıngapýr elinde taǵylymdamadan ótip, sol jerde alynǵan tájirıbeni Qazaqstandaǵy balabaqsha jumysyn jaqsartý maqsatynda qoldanǵanyn atap ótti. Sıngapýrda kómekshi quraldar men ásem bezendirýler qaldyq materıaldardan jasalady, bul tájirıbeni ol «Tabıǵat jáne biz» jobasynda qoldandy. Joba ekologıalyq tárbıege baǵyttalǵan jáne qaldyq zattarǵa ekinshi ómir syılaý konsepsıasymen júzege asyryldy.
Bul shara mektepke deıingi bilim berý uıymdary arasynda jańa ıdeıalar men tásilderdi qoldanysqa engizýge múmkindik týǵyzdy. Qatysýshylar qaldyq zattardy kómekshi qural retinde paıdalanýdyń zamanaýı tásilderimen tanysyp, ekologıalyq jobalyq qyzmetti damytý úshin jańa múmkindikter týraly pikir almasty.
Konferensıa mektepke deıingi bilim berý salasyndaǵy ınovasıalardy nasıhattap, pedagogtarǵa jańa bilim men daǵdylar alýǵa kómektesti. Bul shara balabaqsha pedagogtary úshin paıdaly ári mazmundy boldy, sondaı-aq ekologıalyq tárbıe men jobalyq qyzmettiń ózekti máselelerine nazar aýdardy.