Almaty qalasynyń Óńirlik komýnıkasıalar qyzmetiniń alańynda 2024 jyldyń áıelderdi zorlyq-zombylyqtan qorǵaý jónindegi toptyń 10 aıdaǵy jumysy qorytyndylandy. Kezdesýge «Daǵdarys ortalyqtary odaǵy» zańdy tulǵalar birlestiginiń basqarma tóraǵasy Zýlfıa Baısakova jáne Almaly aýdany Polısıa basqarmasynyń áıelderdi zorlyq-zombylyqtan qorǵaý bólimshesiniń aǵa ınspektory, polısıa maıory Aıgerım Kýlasbekova qatysty, dep habarlaıdy aqshamnews.kz
Brıfıń barysynda Zýlfıa Baısakova áıelderge qatysty zorlyq-zombylyqqa qarsy kúreste keshendi tásildiń mańyzdylyǵyn atap ótti.
«Áıelderge qatysty zorlyq-zombylyqpen kúresý - bul quqyq qorǵaý organdarynyń mindeti ǵana emes, sonymen birge qoǵamnyń jalpy jaýapkershiligi. Turmystyq zorlyq-zombylyqqa tózbeý mádenıetin qalyptastyrý, otbasynyń rólin kúsheıtý jáne qıyn ómirlik jaǵdaılarǵa tap bolǵan áıelderdi qoldaý qajet. Daǵdarys ortalyqtarymen, úkimettik emes uıymdarmen jáne memlekettik organdarmen birlesip biz zardap shekkenderdiń aldyn alýǵa jáne olarǵa kómek kórsetýge baǵyttalǵan belsendi jumysty jalǵastyramyz», - dedi ol.
Polısıanyń málimetinshe, 2024 jyldyń 10 aıynda Almatyda áıelderge qatysty 7705 qylmys tirkelgen, bul ótken jyldyń sáıkes kezeńimen salystyrǵanda 8,1% - ǵa az.
Aıgerım Kýlasbekova zorlyq-zombylyq deńgeıin tómendetý úshin polısıanyń qabyldaǵan sharalary týraly aıtyp berdi.
«Bıyl biz otbasylyq-turmystyq zorlyq-zombylyqtyń aldyn alý boıynsha jumysty kúsheıttik. Profılaktıkalyq esepke 6800-den astam adam qoıyldy, 6200-den astam qorǵanys uıǵarymdary shyǵaryldy. Aıta ketý kerek, bul sharalar tek quqyq buzýshylyqtardyń jolyn kesýdi ǵana emes, sonymen birge zardap shekkenderge kómek kórsetýdi, sondaı-aq agresorlarmen jumys isteýdi de qamtıdy. «Seriktestik-turmystyq zorlyq-zombylyqtyń aldyn alý quraly» pılottyq jobasy aıasynda 105 abúzer psıhokorreksıalyq baǵdarlamalarǵa jiberildi», - dedi A. Kýlasbekova.
Aqparattyq-túsindirý jumystaryna erekshe kóńil bólinedi. 2024 jyly qalanyń oqý oryndary men uıymdarynda 160 dáris, trenıńter men kezdesýler ótkizildi, olarǵa 1000-nan astam turǵyn qatysty. Qalalyq bılbordtarda otbasylyq zorlyq-zombylyqpen kúresýge, sondaı-aq otbasylyq qundylyqtardy saqtaýǵa shaqyratyn áleýmettik rolıkter men urandar bar.
Sonymen qatar, áıelderdi zorlyq-zombylyqtan qorǵaý jónindegi ınspektorlar 776 áıelge konsýltasıalyq kómek kórsetti. Daǵdarys ortalyqtaryna 150 áıel jiberildi, olardyń 45-i balalarymen birge «Jan-Saıa» daǵdarys ortalyǵyn panalady, 9 áıel «Analar úıi» baspanasynan qoldaý tapty.
Brıfıńti qorytyndylaı kele, Zýlfıa Baısakova turmystyq zorlyq-zombylyqpen kúresý úshin birlesken kúsh-jigerdiń qajettiligin atap ótti.
«Profılaktıkanyń barlyq sýbektileriniń — polısıadan azamattyq qoǵamǵa deıingi úılesimdi jumysy ǵana qylmystar sanyn azaıtýǵa jáne áıelder úshin qaýipsiz jaǵdaı jasaýǵa múmkindik beredi. Bizdiń bolashaǵymyz - qurmet pen túsinistikke negizdelgen saý otbasylar», - dedi ol.
Almatyda turmystyq zorlyq-zombylyqtyń aldyn alý jónindegi jumys azamattyq qoǵamdy belsendi tartýǵa jáne ODARA táýekelin baǵalaý ádistemesin qosa alǵanda, halyqaralyq tájirıbeni engizýge basa nazar aýdara otyryp jalǵastyrylatyn bolady.
Anyqtama úshin: «ODARA» – Kanadanyń Ontarıo qalasynda jasalǵan turmystyq zorlyq-zombylyq qaýpin baǵalaýdyń halyqaralyq quraly (OntarioDomesticAssaultRiskAssessment). Agresordy qaıta tárbıeleý máseleleri azamattyq qoǵam ókilderine júkteledi. Otbasylyq-turmystyq zorlyq-zombylyq faktileri boıynsha máselelerdi sheshý agresordy sózsiz bas bostandyǵynan aıyrýǵa emes, onyń tolyqqandy ómirge oralýyna jáne jábirlenýshi tarappen tatýlasýyna baǵyttalǵan.