Aıagúl Mırazovanyń atyndaǵy I Respýblıkalyq matematıka olımpıadasynyń jeńimpazdary belgili boldy
Keshe Almaty qalasyndaǵy Oqýshylar saraıynda A. Mırazova atyndaǵy alǵashqy matematıka olımpıadasynyń júldegerlerin marapattaý rásimi ótti. 23-27 sáýir aralyǵynda ótken jarysqa Qazaqstannyń barlyq óńirlerinen 8-9 synyptyń 250-den astam oqýshysy qatysty. Matematıkadan úzdikterdi anyqtaý tartysy megapolıstiń Alataý aýdanyndaǵy №178 mamandandyrylǵan lıseı qabyrǵasynda ótti.
Olımpıada kúnderi qatysýshylar úshin sporttyq oıyndar, psıhologıalyq trenıńter uıymdastyrylyp, Kók-tóbe mádenıet jáne demalys saıabaǵyna, Almaty haıýanattar baǵyna jáne QR Ortalyq memlekettik mýzeıine ekskýrsıalar ótkizildi.
Olımpıadany uıymdastyrýshylar – Almaty qalasy Bilim basqarmasy, QR Oqý-aǵartý mınıstrligine qarasty «Daryn» respýblıkalyq ǵylymı-praktıkalyq ortalyǵy, Almaty qalasy Bilim basqarmasynyń «Almaty Daryny» daryndy balalar men talantty jastardy anyqtaý jáne qoldaý, sondaı-aq kámeletke tolmaǵan balalardyń quqyqtary men múddelerin qorǵaý ortalyǵy olımpıadany joǵary deńgeıde ótkizýge muqıat daıyndaldy. Ashyqtyq pen akademıalyq adaldyqty saqtaý maqsatynda olımpıada barysy onlaın baqylaýǵa arnalǵan beınebaqylaý júıesimen qamtyldy. Olımpıadanyń ótý barysyn tájirıbeli qazylar alqasy, ata-analar komıtetiniń ókilderi men jýrnalıser baqylady. Olımpıada aıaqtalǵannan keıin qatysýshylardyń hattamalary, tapsyrmalar jáne sheshimderi uıymdastyrýshynyń almaty.daryny.kz – resmı saıtynda jarıalandy.
Qazylar alqasynyń sheshimi boıynsha jeńimpazdar men júldegerler «Daryn» respýblıkalyq ǵylymı-praktıkalyq ortalyǵy men Almaty qalasy Bilim basqarmasynyń I, II jáne III dárejeli dıplomdarymen jáne Aıagúl Toreeva atynan berilgen aqshalaı sertıfıkattarmen marapattaldy. Birinshi oryndy jeńip alǵan bes oqýshy Iandeks Stansıa Maks kolonkalaryn, medaldar jáne 150 000 teńgelik sertıfıkattarǵa ıe boldy. Ekinshi oryn alǵan taǵy bes oqýshy Samsung Galaxy A15 smartfondaryn, medaldar jáne 100 000 teńgelik sertıfıkattardy aldy. Úshinshi oryn alǵan jeti oqýshy Xiaomi Redmi 14 smartfondarymen, medaldar jáne 50 000 teńgelik sertıfıkattarmen marapattaldy. Budan bólek, erekshe jetistikter kórsetken 10 oqýshy arnaıy gramotalar men portatıvti proektorlarǵa ıe boldy.
Sonymen, Aıagúl Mırazova atyndaǵy alǵashqy matematıka olımpıadasynyń jeńimpazdary men júldegerleri:
I oryn
Erık Lım (RFMM), Nurtaı Málik (Aqtóbe), Aleksandr Oleınıkov (Almaty), Anýar Aǵybaev (Almaty), Aısultan Omar (Almaty);
II oryn
Ábilmansur Hakımǵalı (RFMM), Beksultan Máýlitbek (Almaty), Arnat Ernar (Aqtóbe oblysy), Ámirhan Qudaıbergenov (Almaty), Islambek Barlyq (Aqtóbe oblysy);
III oryn
Nurdáýlet Ómirqoja (RFMM), Temir Orazbek (RFMM), Rasul Jákeshev (NISH), Medeý Jubaturov (Mańǵystaý oblysy), Erqanat Ońal (Qaraǵandy oblysy), Denıs Kım (RFMM), Bazaraly Abdýlla (Shymkent).
Arnaıy gramotalar ıegerleri:
Ahmet Berdimýrat (Aqtóbe), Abzal Kúnǵojın (RFMM), Aızere Bısenova (RFMM), Álmansur Kúshebın (Qaraǵandy oblysy), Bekjan Moldabekov (Astana), Abdýrahman Aıdaıbek (Jambyl oblysy), Álı Marat (Atyraý oblysy), Anvar Kamaleev (RFMM), Beksan Altaı (RFMM), Erasyl Maǵaýıa (Almaty).
Almaty qalasy ákiminiń orynbasary Ásem Núsipova respýblıkalyq matematıka olımpıadasynyń sátti ótýine úles qosqan ustazdarǵa óz atynan alǵys hattar tabystady.
Ásem Núsipova óz sózinde bylaı dedi:
«Olımpıadanyń basty maqsaty – daryndy balalardy qoldaý jáne olardyń negizgi pánderge degen qyzyǵýshylyǵyn arttyrý. Bul arqyly olardy ıntellektýaldyq damý jolyna baǵyttaımyz jáne bolashaqta alǵan bilimderin el men qala ıgiligine qoldanýyna múmkindik beremiz. Alda balalar úshin túrli týrnırler men baıqaýlar, sonyń ishinde 1 maýsym – Balalardy qorǵaý kúnine oraı qorytyndylary shyǵarylatyn «Bala Fest» festıvali kútip tur. Ákimdik tarapynan kórsetilip jatqan qoldaý balalardyń bilimge degen yntasyn arttyra túsedi».
Óz kezeginde «Almaty Daryny» ortalyǵynyń dırektory Gýlnýr Karımgajy óz áserimen bólisti:
«Biz osyndaı aýqymdy ári mańyzdy sharany uıymdastyra alǵanymyzdy maqtan tutamyz. Bul olımpıada – kórnekti pedagogqa kórsetilgen qurmet ári oqýshylardy úlken jetistikterge umtylysynyń qýatty quraly. Árbir qatysýshy, nátıjesine qaramastan, óziniń bolashaq tabysyna qaraı mańyzdy qadam jasady dep senemiz. Jas talanttardy qoldaý arqyly biz qoǵamymyzdyń jáne elimizdiń gúldenýiniń berik irgetasyn qalaımyz»
Aıta ketý kerek, Qazaqstannyń alǵashqy Eńbek Eri – Aıagúl Mırazova kóptegen mártebeli marapattardyń ıegeri. Olardyń qatarynda – «Altyn Juldyz» jáne «Otan» ordenderi bar. Aıagúl Toreeva – Qazaqstannyń eńbek sińirgen qaıratkeri, Pedagogıkalyq ǵylymdar akademıasynyń jáne Ulttyq qundylyqtar akademıasynyń akademıgi, Semeı gýmanıtarlyq ýnıversıtetiniń jáne Abaı atyndaǵy Qazaq ulttyq ýnıversıtetiniń profesory, Almaty qalasynyń, Jambyl oblysynyń jáne Jýaly aýdanynyń Qurmetti azamaty. Aıagúl Mırazova 7, 8 jáne 9 synyptarǵa arnalǵan oqýlyqtardyń avtory. Jaqynda, 24 sáýir kúni Y. Altynsarın atyndaǵy №159 gımnazıasynda uly pedagogtyń atymen atalǵan matematıka kabıneti saltanatty túrde ashyldy. Otbasymyzdyń otandyq bilim berý salasyna qosqan ólsheýsiz úlesi jáne óskeleń urpaqty tárbıeleýdegi eńbegi uıymdastyrýshylardy osyndaı mańyzdy respýblıkalyq olımpıadany ótkizýge jáne oǵan Aıagúl Toreeva atyn berýge shabyttandyrdy.