Sot alaıaqtardy túrli merzimge sottady.
Eki alaıaq marqum bolǵan almatylyqtyń bank shotynan bir mıllıard teńge urlamaq bolǵan, dep habarlaıdy Almaty-akshamy.kz qalalyq prokýratýraǵa silteme jasap.
Vedomstvo málimetinshe, er adam men áıel marqum almatylyq turǵynnyń qaryzy bar dep sotqa aryzdanǵan. Olar jalǵan qujat jasap, sotta jeńiske jetken. Osydan keıin jeke sot oryndaýshysy sot sheshimi negizinde óz esepshotyna marqumnyń bank shotynda saqtalǵan 1 mıllıard teńgeni aýdarǵan. Qarajat keıinnen óndirip alýshylarǵa aýdarylýy tıis bolǵan.
«Alaıda marqumnyń áıeli der kezinde alaıaqtardyń qylmystyq áreketteriniń jolyn kesti. Ol quqyq qorǵaý organdaryna júgingen, sol arqyly kináliler qylmystyq áreketterin aıaqtaı almady. Sotaldy tergep-tekserý barysynda jáne sotta marqumnyń is júzinde eshkimniń aldynda eshqandaı qaryzy bolmaǵany anyqtaldy», - dedi prokýrorlar.
Sot alaıaqtardy túrli merzimge sottady. Apelásıalyq sot zańdy kúshine engen úkimdi ózgerissiz qaldyrdy.