Oqýshylar saraıynda №64 jalpy bilim beretin mekteptiń uıymdastyrýymen jáne Almaty qalasy Bilim basqarmasynyń qoldaýymen «Zhas Maman 2025» mamandyqtar jármeńkesi ótti.
İs-sharanyń basty maqsaty – joǵary synyp oqýshylaryna bolashaq mamandyǵyn durys tańdaýǵa kómektesý, eńbek naryǵyndaǵy suranysqa ıe kásiptermen tanystyrý jáne tıisti bilim ornyn anyqtaýǵa járdemdesý. Jármeńke barysynda oqýshylar túrli kolej ókilderimen kezdesip, olardan mamandyqtar týraly kóptegen aqparat aldy. Sonymen qatar, kásibı baǵdar berýshilerdiń qatysýymen ótken sheberlik synyptarynda óz múmkindikterin baǵamdap, bolashaqqa naqty jospar qurýǵa múmkindik aldy.
Sharanyń ashylýynda №64 mekteptiń dırektory, moderator Sultan Aıtbaev sóz sóılep, mamandyq tańdaýdyń mańyzdylyǵyna toqtaldy.
– Bıylǵy jármeńke mańyzdy kezeńmen – Jumysshy mamandyqtar jylymen tuspa-tus kelip otyr. Bul shara – qoǵamdaǵy eńbektiń baǵa jetpes qundylyǵyn moıyndaýdyń belgisi. Qoǵamdy alǵa jyljytatyn, damytatyn jumysshy mamandyqtardyń róli erekshe. Biz osy kásipterdi tańdaǵan jandardyń eńbegin qurmetteýimiz kerek. Óıtkeni olardyń arqasynda ekonomıka damyp, jańa múmkindikter ashylady. Búgin biz adamzattyń barlyq jetistikteriniń negizinde turǵan kásiptermen tanysýǵa múmkindik aldyq. Qurylysshylar, mashınıster, elektrıkter men slesarlar – bul tek mamandyq qana emes, óz isine adaldyqty, jaýapkershilikti, adaldyq pen eńbekqorlyqty talap etetin ómirlik tańdaý. Jumysshy mamandyqtar – tek ekonomıkanyń tiregi ǵana emes, sonymen qatar ár adam úshin turaqty bolashaqqa aparatyn jol. Bul salalarda mansaptyq ósýge, shyǵarmashylyq áleýetti iske asyrýǵa jáne eldiń damýyna úles qosýǵa múmkindik mol», – dedi ol.
Jármeńkege qatysýshylardyń biri, Prıntmedıa tehnologıalar kolejiniń stýdenti Eńlik Bapan da óz pikirimen bólisti.
– Men mamandyq tańdaýda uzaq oılandym. Osyndaı jármeńkelerdiń arqasynda ózime laıyqty joldy taba aldym. Ózim oqıtyn kolejimniń de bilim sapasy qatty unaıdy. Búgingi is-shara men sıaqty bolashaq mamandyǵyn izdep júrgen oqýshylar úshin óte paıdaly boldy. Jumysshy mamandyqtar tek qoǵamǵa qajetti ǵana emes, sonymen birge turaqty tabys pen óz isińe degen súıispenshilik syılaıtyn kásipter. Sondyqtan, eń bastysy – júrek qalaýymen tańdaý jasaý, – dedi ol.
Jármeńkege qatysýshylar bul sharanyń ózderine úlken paıda ákelgenin aıtyp, uıymdastyrýshylarǵa alǵystaryn bildirdi. Kóptegen oqýshy ózine laıyqty mamandyq pen oqý ornyn tańdaý boıynsha mańyzdy aqparat aldy.
№64 mektep pen Almaty qalasy Bilim basqarmasy aldaǵy ýaqytta da osyndaı paıdaly is-sharalardy uıymdastyryp, oqýshylardyń kásibı baǵdaryn aıqyndaýǵa qoldaý kórsetetinin jetkizdi.